75% sheteldik saıahatshy Astana men Almatyǵa keledi – «Kazakh Tourism»

<p>ASTANA. KAZINFORM &ndash; Elimizdi Ortalyq Azııa boıynsha týrıstik týrlar qataryna qosý jaǵy qaralyp jatyr. Bul týraly &laquo;Kazakh Tourism&raquo; ulttyq kompanııasynyń basqarma tóraǵasy Qaırat Sádýaqasov málim etti.</p>

«Alshaqtyqty azaıtý maqsatynda áleýeti joǵary aımaqtarda týrızmdi ilgeriletý mindetin qoıyp otyrmyz. Atap aıtqanda, Túrkistan men Shymkentti «Jibek joly» boıy týryna qosý, sondaı-aq Túrkistan-Aqtaý derbes týrıstik baǵytyn damytý boıynsha jumys júrgizilýde. Biz Ózbekstan, Túrkııa, Koreıa jáne basqa da elderdiń týrıstik operatorlarymen birqatar kezdesý ótkizip, Qazaqstandy Ortalyq Azııa boıynsha týrlar qataryna qosý nıetin bekittik», - dedi Qaırat Sádýaqasov Týrızm jáne sport mınıstrliginiń keńeıtilgen alqa otyrysynda.

Onyń aıtýynsha, bıyl elimizdiń týrızm salasy boıynsha 3 halyqaralyq kórmege qatysýy josparlanǵan, ITB Berlin (5-7 naýryz), ATM Dubai (6-9 mamyr), China Outbound Travel & tourism Market (16-18 qazan).

Sondaı-aq, osy jyly sheteldik týrısterdi tartý maqsatynda Delı, Seýl jáne Kýala-Lýmpýr qalasynda 3 roýd-shoý ótkizý kózdelgen.

«Kazakh Tourism» AQ deregine sáıkes, sheteldik saıahatshylardyń 75%-y Astana jáne Almaty qalasyna keledi. Odan ári bestik qatarynda Mańǵystaý jáne Atyraý oblysy, sondaı-aq Shymkent qalasy bar.