7429 aýyl turǵynyna kásipkerlikti damytý úshin 2,5%-ben shaǵyn nesıe berildi

Úkimet Prezıdenttiń aýyl sharýashylyǵy kooperatsııasy arqyly aýyldaǵy kásipkerlikti damytý jónindegi tapsyrmasyn belsendi túrde júzege asyryp keledi. Bul maqsatta «Aýyl amanaty» jobasy iske asyrylyp otyr, onyń sheńberinde aýyl turǵyndaryna jyldyq 2,5%-ben 5-7 jyl merzimge shaǵyn nesıe beriledi, dep habarlaıdy QazAqparat QR Úkimetiniń baspasóz qyzmetine silteme jasap.

Jobanyń oryndalý barysy QR Úkimeti Apparaty janyndaǵy «Aýyl Amanaty» jobalyq keńsesiniń kezekti otyrysynda talqylandy. Jıynǵa Premer-Mınıstrdiń orynbasary T.Dúısenova qatysty.

Máselen, osy jyldyń 13 qyrkúıeginde 1388 aýyldyq okrýgti qamtıtyn 42 mlrd teńge somasyna 7429 shaǵyn nesıe berildi.

Onyń 85%-y mal sharýashylyǵy salasyna (35,8 mlrd. teńge), 7%-y ósimdik sharýashylyǵyna (2,8 mlrd. teńge), 5%-y kooperatıvter úshin aýyl sharýashylyǵy tehnıkasy men jabdyqtaryn satyp alýǵa jáne 2,6%-y basqa baǵyttarǵa (1,1 mlrd. teńge) berilgen.

Jıyn qorytyndysyna sáıkes Premer-Mınıstrdiń orynbasary jaýapty memlekettik organdar men óńirlerge oblys, aýdan, aýyldyq okrýg deńgeıinde jobalyq keńseler qurý, tsıfrlyq platformany ázirleý protsesin jedeldetý jóninde tapsyrmalar berdi.