73 jyldan keıin sarbazdyń súıegi eline jetkizildi
Uly Otan soǵysy jyldary Ýkraınany azat etýde Almaty oblysynan Satybaldy Muhamedıev te attanǵan edi. Alǵashqyda hat jazyp, sońynan habarsyz ketken onyń sýıegi endi tabyldy.
Búgin Uly Otan Soǵysynda jastaı qyrshyn ketken Satybaldy Muhamedıevtiń súıegin týǵan topyraǵyna tapsyrý aldyndaǵy qaraly mıtıngi ótti. Jıynǵa marqumnyń týystary da arnaıy qatysty.
«Satybaldy atamyzdyń súıegi tabyldy degende óte qatty qýandyq. Tirilip kelgendeı áser aldyq. Bıylǵy jylǵy izdestirý nátıjeli aıaqtalyp, Satybaldy atamyzdyń súıegi tabylyp týǵan jerine qaıtarylyp otyr. Osy atamyzdyń súıegin izdestirip, tabýǵa óz úlesin qosqan barsha aǵaıynǵa otbasymyzdyń atynan alǵysymyzdy bildiremiz»,- dep Satybaldy Muhamedıevtiń týysy Gúlsim Ysqaqova óz rızashylyǵyn bildirdi.
Búgin Satybaldy Muhamedıevtiń súıegi týǵan jeri Eskeldi aýdany Jalǵyzaǵash aýylynda jerlendi.
Muhamedıev Satybaldynyń súıegi Ýkraınanyń Kıev oblysy Ivanovsk aýdanynan tabyldy. 2016 jyly 10 shildede «Ýkraına izdeý jasaqtarynyń Odaǵy» izdeý otrıadynyń jumystary nátıjesinde múmkin boldy. Qazaq jaýyngeri 1943 jyly Ýkraınany azat etýde erlikpen qaza tapqan.
Muhamedıev Satybaldy 1925 jyly Jalǵyzaǵash aýylynda qyzmetker januıasynda dúnıege kelgen. Ákesi Muhamedı Rýdnıkte elektrık qyzmetin atqarǵan. Anasy - Bıbi úı sharýasymen aınalysqan. Ózimen birge týǵan aǵasy Muhamedqalı 1909 jylǵy, qaryndasy Jumataı 1927 jylǵy.
Sovet Armııasynyń qataryna 1942 jyly tamyz aıynda alynyp, №89 bólim komandıriniń qaramaǵynda №71780 eshelonymen soǵysqa attandy. Osy eshelonda ketkenderdin tiziminde aýdandyq voenkomattyń deregi boıynsha 1924 jyly týǵan dep kórsetilgen. Demek Satybaldy jasyna bir jyl qosyp aıtqan. Áskerge shaqyrylǵandardyń tiziminde Muhamedıev Satybaldy 1925 jyly týǵan dep kórsetilgen. Qaryndasy Jumataı men anasy Bıbi Satybaldynyń eki ret aýdan voenkomatyna baryp soǵysqa suranyp ketkenin aıtqan. Ol kezde baýyry Mýhamedqalı soǵysta bolǵan. Soǵystan jaraqat alyp bir qolynan aıyrylǵan baýyry aýylǵa qaıtyp kelgende Satybaldy soǵysqa attanyp ketken. Aǵaıyndy baýyrlar osylaısha birin biri kórmeı qaldy. 1943 jyldyń kúzine deıin Satybaldydan kelgen hattar jaýǵa degen yza-kekke toly edi. Jaýyngerden kelgen sońǵy hat, Dnepr ózeninen ótkeli turmyz kópke deıin hat jazýǵa múmkindik bolmas delingen edi. Sebebi fashısterdin betin toıtaryp, eldi mekendi qaıtarý qan tógissiz bolmaıtyny bárine belgili bolatyn. Osy hattan keıin esh habar kelmegen. Soǵys bitkennen keıin eki qaıtara izdeý salǵanda eki retinde de habarsyz ketken degen jaýap keldi.