72 jastaǵy túrkistandyq qarııa aýylǵa sport alańshasyn salyp berdi

TÚRKІSTAN. QazAqparat – Otyrar aýdanynyń turǵyny, 72 jastaǵy qarııa Dúısenbek Bojaev týǵan jerine balalarǵa arnalǵan ashyq sport alańshasyn salyp berdi, dep habarlaıdy QazAqparat tilshisi.

Jańa oıyn alańshasy zaman talabyna saı salynǵan. Jan-jaǵy temirmen qorshalyp, qaýipsizdik sharalary qatań saqtalǵan. Jerge tóselgen jasyl jelek te standarttarǵa saı kelip tur. Al alańsha syrtynda búldirshinder úshin oıyn quraldary ornatyldy. Munda balalar bos ýaqytyn tıimdi ótkizý úshin átkenshek, týrnık jáne ózge de jabdyqtar bar.

Sport nysanynyń saltanatty jaǵdaıda ashylýynda Otyrar aýdanynyń ákimi Sáken Sultanhanov týǵan jerin túletýge atsalysqan azamatqa aýyl halqynyń atynan alǵys aıtty.

«Aýylyna qarap azamatyn tany» dep dana halqymyz beker aıtpaǵan. Kıeli Otyrar aýdanynyń, onyń ishinde Temir aýylynyń ósip-órkendeýi, gúldenýi osy aýyldan shyqqan el aǵalarynyń arqasynda dep bilemin. Osy oraıda, memleket saıasatyn iske asyrýda óziniń azamattyq boryshyna adaldyq tanytyp, týǵan eliniń, týǵan jeriniń damýyna atsalysyp kele jatqan sizge shynaıy alǵysymdy bildiremin», – dedi aýdan basshysy.

Saltanatty sharaǵa qatysqan Túrkistan oblystyq máslıhatynyń depýtaty Myrzahan Manapov pen QR eńbek sińirgen jattyqtyrýshysy Jonarbek Qanybekov qarııanyń ıgi isi kópke úlgi bolýyn tiledi. Aýdandyq ardagerler keńesiniń tóraǵasy Bektiqul Arzyqul men Temir aýyldyq ardagerler uıymynyń tóraǵasy Tórehan Amantaı el ıgiligi jolyndaǵy ónegeli iske uıytqy bolǵan Dúısenbek Bojaevqa rızashylyǵyn bildirip, aq batasyn berdi.

Sondaı-aq jańa alańda 2010-2011 jyly týǵan jasóspirimder arasynda fýtboldan aýdandyq týrnır ótti. Іs-shara sońynda jeńimpazdar marapattalyp, júldegerlerge arnaıy syılyqtar tabystaldy.