700 myń ret jalǵa berildi: Astanada «Velobike» velomaýsymy aıaqtaldy

NUR-SULTAN. QazAqparat – Bıyl Nur-Sultan qalasynda «Velobike» velosıpedterdi jalǵa alý maýsymy aıaqtaldy, dep habarlaıdy QazAqparat City Transportation Systems kompanııasyna silteme jasap.

Bıyl elordada «Velobike» velomaýsymy 15 sáýirden 31 qazanǵa deıin sozyldy. Osy ýaqyt ishinde velosıpedterdi 11 myńnan astam adam paıdalandy, 12 myńnan astam abonement satyp alyndy. 700 myń ret jalǵa alý iske asyryldy.

Velomaýsym bastalǵannan beri paıdalanýshylar 1,5 mıllıon shaqyrym qashyqtyqty júrip ótken. Olardyń biri osy kezeńde 7,5 myń qashyqtyqty eńserdi.

Bıylǵy maýsymda qalanyń ár jerinde 155 velostantsııa ornatylyp, jalǵa alýǵa barlyǵy 1 myńnan kóp velosıped usynyldy.

Eske salaıyq, Qazaqstandaǵy alǵashqy velosherıng júıesi elordada 2014 jyly iske qosyldy.

Búginde velosıpedti jalǵa alý protsedýrasy jeńildetilgen. Ol úshin velobike.kz saıtynda onlaın tirkeýden ótip, logın men parol alý jetkilikti. Kaspi.kz jáne Qiwi arqyly onlaın tóleý fýnktsııalary engizildi. Velosıpedterdi 16 jasqa tolǵan azamattar jalǵa ala alady. Abonementterdi velobike.kz saıtynda jáne City Transportation Systems kassalarynda satyp aýǵa bolady.

Aıta keteıik, velomaýsym aıaqtalǵannan keıin abonenttik tólem kelesi maýsymǵa saqtalmaıdy. Tek teńgerim aýystyrylady. Qajet bolǵan jaǵdaıda shottaǵy qarajatty R. Qoshqarbaev dańǵyly, 50/1 mekenjaıyndaǵy ortalyq kassadan qaıtarýǵa bolady.

Jańa velomaýsym 2022 jyldyń sáýir aıynda qaıta bastalatyny josparlanǵan.