700 mańǵystaýlyqtyń 5 juldyzdy qonaqúıde jumys isteýge múmkindigi bar
Aqtaýdan 20 shaqyrym qashyqtyqta teńiz jaǵalaýynda qurylysy bastalǵan demalys kesheninde kez kelgen jan qyzmet etýge bolady. Ol úshin aldymen qonaqúı bıznesi boıynsha 6 aılyq arnaıy kýrstan ótýi kerek. Qoıylǵan talap qandaı?
Jalpy, 6 aılyq kýrsta 1200-ge jýyq adam oqytylady dep josparlanǵan. Qazir týrızm kolledjinde alǵashqy sabaqtar bastaldy. Nur-Sultan qalasynan kelgen muǵalimder qonaqúı bıznesi boıynsha teorııalyq negizder boıynsha úıretýde. Ári qaraı, qatysýshylar sertıfıkat alyp, óńirden tájirıbeden ótedi.
Aıta keteıik, jas mólsherine shekteý qoıylmaǵan. Oqý nátıjesi boıynsha ár kezeńdegi úzdikter anyqtalyp otyrady. Onyń 200-i Túrkııaǵa tájirıbege jiberiledi.
«Rixos qonaqúıinde jumys isteýge nıetti kez kelgen turǵyn aldymen Rata.kz saıtyna kirip, tirkelý kerek. Sol jerde ótinishin toltyryp, sodan soń saýalnamadan ótedi. Ári qaraı oqýdy bastaıdy. Oqýdy 6 etapqa bóldik. Onyń ishinde úzdikterin iriktep otyramyz. 1200 adamnyń ishinen tańdalady. 4 sektorǵa bólinedi. Mysaly, bólimderine qaraı daıashylar, barmen, aspazshylar, tazalaýshylar jáne resepshon mamandary daıyndalady», - deıdi joba koordınatory Serik Isaǵalıev.
Aqtaýdaǵy qonaqúıde jumys isteýge yntaly bilim alýshylardyń biri - Elaman Aısaev. Týrızm kolledjiniń stýdenti resepshon mamany bolmaq. Sebebi, bul bólim qonaqúıdiń júregi, bet-beınesi. Ol aǵylshyn tilin erkin meńgergen.
«Qonaqúıge kelgen kez kelgen adam aldymen resepshonǵa keledi. Qazir arnaıy bilimimdi jetildirýdemin. «Rıhos» 5 juldyzdy qonaqúı bolǵandyqtan, árıne jalaqymyz da joǵary bolady dep oılaımyn. Qonaqtardy qalaı qarsy alýyńnan bastap, shyǵaryp salǵanyńa deıin qonaqúıdiń dárejesin bildiredi. Sondyqtan biz bárinen habardar bolýymyz kerek»,- deıdi stýdent Elaman Aısaev.
«Rixos» jobasy boıynsha kadrlardy daıyndaý júzege asýda. Eýrazııa ýnıversıtetinen keldik. Stýdentter men qatysýshylardy daıyndaýdamyz. Qonaqúı bıznesi boıynsha, restoran, qyzmet kórsetý, trevel týrızm, ushaqtaǵy, kemedegi, avtobýstaǵy qyzmet kórsetý salasyna úıretip jatyrmyz», - deıdi lektor Dıdar Qarataev.
Aıta keteıik, atalǵan qonaq úı maýsym aıynda ashylady dep josparlanǵan. Munda 500 nómirli bólmeden bólek, keshen aýmaǵynda 15 vılla, akvapark, basseın, 4 meıramhana bolady. Bir aýysymda 1 myń qonaqty qabyldaýǵa múmkindigi bar.