70 jastaǵy taksıst apaı óz tańdaýyn jasady

AQTAÝ. QazAqparat - Mańǵystaý oblysyna «taksıst Gúlshara apaı» degen atpen tanymal kópbalaly ana, «Altyn alqa» ıegeri Gúlshara Joldasbaeva Shetpe aýylyndaǵy №166 saılaý ýchaskesinde daýys berdi, dep habarlaıdy QazAqparat tilshisi.

Ol 20 jyldan astam ýaqyt kólik júrgizip, «Aqtaý-Shetpe» baǵytynda jolaýshy tasymaldap júr.

Elimizdiń árbir azamaty bul saıası sharaǵa qatysyp, óz daýysyn berýdi mártebeli is dep qabyldaýy kerek. Sebebi saılaýǵa qatysyp, daýys berý arqyly kemel keleshegi men jarqyn bolashaǵyn aıqyndaıdy. Mańyzdy kúnde óz daýysyn berýge kelgen Gúlshara anamyzdyń pikiri osyǵan saıady.

«Bul saılaýdyń mańyzy zor. Sebebi turǵyndar ár aýmaqtyń bolashaǵy úshin jumys jasaıtyn bılik pen halyqtyń arasyndaǵy kópir — depýtattarǵa daýys berip, óz tańdaýyn jasaıdy. Kópshiliktiń daýysymen saılanǵan depýtat aýdanymyzdy, elimizdi kórkeıtip, gúldendirý úshin kúsh-jigerin jumsaıdy dep senim bildiremin», – deıdi G.Joldasbekova.

Ómirge esh ókpelemeı, eńbek etýdi qoldaıtyn Gúlshara apaı buǵan deıin QazAqparat tilshisine suhbat bergen bolatyn.