7 jylda kópbalaly otbasylarǵa 40 myńnan astam páter salý kózdelýde - Jaıymbetov

ORAL. QazAqparat - Qazaqstanda jeti jyl ishinde kópbalaly otbasylarǵa arnalǵan 40 myńnan astam páter salý kózdelýde. Bul týraly BQO-ǵa Úkimettik jumys toby quramynda kelgen Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov málim etti, dep habarlaıdy QazAqparat tilshisi.

Onyń aıtýynsha, Elbasymyzdyń «Nur Otan» partııasynyń HVІІІ sezinde atalmysh mınıstrlikke bergen mańyzdy tapsyrmasynyń biri - osy baspanamen qamtý máselesi.

Qazirgi kezde elimizde 340 myń kópbalaly otbasy bolsa, sonyń 28,1 myńy turǵyn úı kezeginde tur.

Memleket basshysynyń tapsyrmasyna sáıkes jyl saıyn turǵyn úı qurylysyna 50 mlrd teńge bólinip, 6 myń páter iske qosylady. Sonda 2025 jyldy qosa eseptegende, 350 mlrd teńgege 42 myń jaldamaly páter iske qosylmaqshy. Sonymen qatar zaımǵa beriletin baspanany qosqanda, 100 myńdaı páter boı kótermekshi.

Komıtet tóraǵasynyń sózine qaraǵanda, Batys Qazaqstan oblysynda jyl saıyn bul maqsatqa (242 páterge) 2,1 mlrd teńge jumsalmaqshy. Óńirde kúni búgin 1134 kópbalaly otbasy kezekte tursa, 2019-2025 jyldary 1613 páter paıdalanýǵa berilmekshi.

«Elimizde bul jóninen Túrkistan oblysy kósh bastap tur. Onda 4832 kópbalaly kezekte tursa, jyl saıyn 1031 páter salýǵa 8,6 mlrd teńge qaralady. Sol sekildi Almaty oblysynda 3149 otbasyny baspanamen qamtý úshin jyl saıyn 672 páter turǵyzý úshin 5,6 mlrd teńge bólinedi. Osylaısha jalǵasa beredi. Kópbalaly otbasylarǵa turǵyn úı satyp alý úshin jeńildikter de qarastyrylǵan», dedi komıtet tóraǵasy.