7 jasar Alısha Bısalıeva shahmattan álem chempıony atandy

<p>ASTANA. KAZINFORM — Astanalyq Alısha Bısalıeva Qazaqstan shahmatshylary arasynda birinshi bolyp 2024 jyldaǵy álem chempıony atandy. Ol Albanııanyń Dýrres qalasynda 8 jasqa deıingiler arasynda rapıdten top jardy.</p>

Adrıatıka teńizi jaǵasynda ornalasqan Dýrres qalasynda tez shahmattan (rapıd jáne blıts) kadetter arasynda (FIDE World Cadet Rapid & Blitz Championships 2024) ótken álem chempıonatyna qyryqqa jýyq elden jas shahmatshylar úsh salmaq sanatynda synǵa tústi. 

«Bizdiń jas shahmatshylar eń joǵary deńgeıdegi jarqyn jeńisterimen qýantýdy jalǵastyrýda. Altyndy qosqanda, rapıd pen blıtsten álem chempıonatyndaǵy alty medal — birinshi kezekte bapkerlik shtab, ata-analar men sportshylardyń ózderiniń úlken jumystarynyń nátıjesi. Bul balalar — Qazaqstannyń ǵana maqtanyshy emes, shahmatpen endi aınalysa bastaǵan júzdegen jáne myńdaǵan qurby-qurdastary úshin tamasha úlgi» dedi Qazaqstan shahmat federatsııasynyń prezıdenti Tımýr Týrlov. 

Atalmysh jarysta Qazaqstannan barlyǵy 22 jas shahmatshy óner kórsetip, 6 medal jeńip aldy.

Sonyń ishinde astanalyq Alısha Bısalıeva 8 jasqa deıingiler arasynda rapıdten aldyna jan salmady. Oǵan qosa Alısha blıtsten kúmis aldy.

Blıtsten sondaı-aq aqtóbelik Nuraly Nurshın kúmis medaldi enshiledi. Al túrkistandyq Nurıslam Sultanhan (rapıd, 8 jasqa deıingiler), aqtóbelik Hanzada Amanjol (rapıd, 12 jasqa deıingiler) jáne astanalyq Álimjan Jaýynbaı (blıts, 10 jasqa deıingiler) úzdik úshtikti túıindedi.