7-synyp oqýshysy Kırıll Svırıdov Abaıdyń 30 óleńin jatqa biledi

PAVLODAR. QazAqparat - Oblys ortalyǵynyń K. Makpaleev atyndaǵy № 4 jalpy orta bilim berý mektebiniń 7-synyp oqýshysy Kırıll Svırıdov qalalyq jáne respýblıkalyq konkýrstardyń júldegeri, dep habarlaıdy pavlodarnews.kz.

Oqýshynyń ustazy qazaq tili men ádebıetiniń muǵalimi Mánzılıa Tóleýbaevanyń aıtýynsha, Kırılldiń Abaı óleńderine degen qyzyǵýshylyǵy 3-synyptan bastalǵan. Sodan beri ol Abaı oqýlary men «Myń bala» ǵylymı-aǵartýshylyq jobasyna qatysyp, Qazaqstan halqy Assambleıasynyń Alǵys hatyna ıe bolǵan. - Men Abaıdyń 30 óleńin jatqa bilemin, - deıdi Kırıll Svırıdov. – Abaı óleńderi arqyly qazaq halqynyń tarıhy men muń-muqtajyn túsindim. Bolashaqta qazaq tilin erkin meńgerýge tyrysamyn.

Aıta keteıik, jaqynda Ertis mýzeıinde Abaıdyń «Jıdebaı-Bórili» mýzeıiniń ekspozıtsııasynyń ashylýynda Kırıll Svırıdov «Senbe jurtqa» óleńin oqydy.

K. Makpaleev atyndaǵy № 4 jalpy orta bilim berý mektebi memlekettik jáne orys tilderinde bilim beretin oqý orny. Munda 1406 oqýshy bilim alady.