7 protsenttik ıpotekanyń aı saıynǵy tólemaqysy eki esege tómen bolady
Ekonomıst Saparbaı Jýbaevtyń oıynsha, búginde ınflıatsııanyń deńgeıi 7 protsent, al Ulttyq banktiń bazalyq stavkasy 9,5 protsent bolyp turǵanda ekinshi deńgeıli bankterge arzan ıpotekany bergen tıimsiz.
«Menińshe, «7-20-25» baǵdarlamasy aıasynda bir trıllıon teńgeniń ıpotekalyq qory qurylady. Ol Turǵyn úı qurylys jınaq banki sııaqty memlekettik qarjy uıymy retinde jumys isteıdi. Ipotekalyq kompanııa deımiz be, ıpotekalyq damý qory deımiz be, atalǵan uıym kez kelgen bankpen jumys isteı beredi. Biraq bankter tek oryndaýshy qyzmetin, ıaǵnı memlekettiń bólip bergen qarjysyn taratýdy ǵana iske asyrady. Sol úshin azǵandaı ótemaqysyn alýy múmkin», - dedi S.Jýbaev QazAqparat tilshisin bergen suhbatynda.
Onyń aıtýynsha, búginde ortasha eseppen bir ıpotekanyń aılyq tólemaqysy 100-120 myń teńgeni qurap otyr. Ondaı aqsha báriniń qaltasyna shaq kele bermeıdi.
««7-20-25» baǵdarlamasy aıasynda aı saıynǵy tólem eki esege tómen bolady. Men ózim eseptep kórdim. Máselen, 15 mln teńgeniń ıpotekasy bolsa, aı saıyn bar bolǵany 55-65 teńgeni ǵana tóleısiń. Endi, 7 protsentpen tólegende alǵashqy onjyldyqta nesıeniń ózi ótelse, keıingi onjyldyqta ol eki eselenedi. Biraq ıpotekanyń merzimi 25 jyl bolǵannan keıin ol onsha bilinbeıdi. Sosyn aldyn ala tóleý de bolatyn shyǵar», - dep atap kórsetti S.Jýbaev.
Aıta keteıik, ótken aptada QR Premer-Mınıstri Baqytjan Saǵyntaev «7-20-25» baǵdarlamasyn iske asyrý tetikterin ázirleýdi tapsyrǵan bolatyn. QR Investıtsııalar jáne damý mınıstri Jeńis Qasymbektiń aıtýynsha, arzan ıpoteka barlyǵyna jetedi.