7 paıyzdyq ıpotekalyq nesıe qashannan bastap beriledi

ASTANA. QazAqparat - Aǵymdaǵy jyldan  bastap 7 paıyzdyq ıpotekalyq nesıe berile bastaýy múmkin. Bul týraly búgin QR Prezıdenti Nursultan Nazarbaevtyń 5 áleýmettik bastamasyna oraı pikir bildirgen Májilis depýtaty Nurtaı Sabılıanov aıtty, dep habarlaıdy QazAqparat.

«Elbasymyzdyń búgingi bastamasynda halyqqa jeńildetilgen nesıe berý máselesi  tolyq sheshimin taýyp otyr. Endi biz Prezıdent bastamalaryn jańa zańdar, jańa normatıvtik-quqyqtyq aktiler qabyldaý arqyly sapaly túrde júzege asyrýymyz qajet», - dedi depýtat.

Onyń aıtýynsha, «7-20-25» baǵdarlamasy arqyly halyq 25 jylǵa 7 paıyzben  nesıe alýǵa qol jetkizedi.

«Nesıeni ekinshi deńgeıli bankter arqyly da alýǵa múmkindik týyndaıdy. Qazirgi ýaqytta Turǵynúıqurylysjınaqbanki arqyly ǵana nesıe berilip jatyr. Al bul banktiń barlyq óńirde bólimsheleri joq. Sondyqtan halyqqa qaı bank yńǵaıly bolsa sodan jeńildetilgen nesıe berý qolǵa alynady. ıAǵnı, Qazaqstannyń barlyq bankteri osy baǵdarlama aıasynda jeńildetilgen ıpotekalyq nesıe berý múmkindigin ıe bolady. Elbasynyń osy bastamalaryn zańmen qamtamasyz etip, bıýdjet naqtylanǵannan keıin jeńildetilgen nesıe berý bastalady dep oılaımyn. Menińshe, osy jyldan bastap halyq jeńildetilgen nesıe alyp qalýy yqtımal. Óıtkeni, respýblıkalyq bıýdjet naqtylanǵan kezde Elbasynyń osy bastamalaryn júzege asyrýǵa arnalǵan qarajattar qarastyrylady», - dedi Nurtaı Sabılıanov.

Depýtattyń paıymynsha, jańa baǵdarlamanyń júzege asyrylýy turǵyn úılerdiń qymbattaýyna túrtki bolmaıdy.

«Qazirgi ýaqytta úılerdiń baǵasy birqalypty, turaqty. Qaıta turǵyn úı salý arqyly bizde shaǵyn jáne bıznes damyp, jańa jumys oryndary ashylatyn bolady», - dedi ol.