7 oblysta 3 745 jer úı sý astynda qaldy
«Sý tasqyny bastalǵaly beri 75 982 adam, onyń ishinde 18 681 bala qutqaryldy. Tartylǵan áýe kemeleriniń kómegimen 2 811 adam, onyń ishinde 865 bala qutqaryldy. Ýaqytsha ornalasý pýnktterine 7 mynan astam adam, onyń ishinde 2 794 bala ornalastyryldy. 69 971 janýar qaýipsizdik jerge aıdaldy. Zardap shekken óńirlerge 126 tonna gýmanıtarlyq kómek jetkizildi. Birlesken kúshtermen 7,7 mln astam tekshe metr erigen qar sýy soryldy. 993 myń qapshyq jáne 982 myń tonna ınertti materıal tóseldi. 1 739 turǵyn úı men 1 743 aýla aýmaǵynan sý buryldy»,- dedi ol Ortalyq kommýnıkatsııalar qyzmetindegi brıfıngte.
Onyń dereginshe, táýlik boıy avarııalyq-qutqarý jumystaryna 16 375 adam, 1 651 tehnıka, 377 sý sorý jáne 81 júzý quraly, 15 áýe kemesi jumyldyryldy.
«Osy saǵatta Atyraý, Aqtóbe, Aqmola, Qostanaı, Shyǵys Qazaqstan, Soltústik Qazaqstan jáne Pavlodar oblystarynda 3 745 jer úı, 421 aýla aýmaǵy sý astynda qalýda. Sý shaıǵan 105 avtojol, onyń ishinde 4 kópir men 101 jol tósemi baqylaýda tur. Kólik qatynasynsyz qalǵan 65 eldi meken baqylaýda. Atyraý, Aqtóbe, Aqmola, Qostanaı, Shyǵys Qazaqstan, Soltústik Qazaqstan jáne Pavlodar oblystary respýblıkalyq shtabtyń baqylaýynda. «Jedel jeli» telefonyna 1 052 qońyraý tústi. Respýblıkalyq jáne jedel shtabtar jumys isteıdi. Barlyq kúshter men quraldar tótenshe jaǵdaılardyń aldyn alý men joıýǵa jumyldyryldy. Jaǵdaı kúrdelenetin bolsa, shuǵyl sharalar qabyldanady», - dedi Erasyl Saıpash.
Sý basqan aımaqty ınspektsııalaý barysynda Premer-Mınıstrdiń birinshi orynbasary Roman Sklıar Soltústik Qazaqstan oblysy Taıynsha aýdany Krasnaıa polıana aýlynyń turǵyndarymen kezdesti, onda 8 úı sý astynda qaldy.
Jergilikti turǵyndarmen áńgimelesý barysynda birinshi vıtse-premer zardap shekkenderge keltirilgen barlyq zalal óteletinin, materıaldyq shyǵyndy memleket jabatynyn málimdedi.