7 myńnan asa adamnyń bankrottyqqa bergen ótinishi qanaǵattandyrylmady

ASTANA. QazAqparat – Qarjy vıtse-mınıstri Erjan Birjanov ózin sotsyz bankrot dep jarııalaǵysy kelgen keı azamattardyń ótinishi nege qanaǵattandyrylmaǵanyn túsindirdi, habarlaıdy QazAqparat tilshisi.

«Búginde bankrottyq boıynsha kelip túsken 10 382 ótinish qaraldy. Bul - barlyq kelip túsken ótinishtiń 30 paıyzy. Osylaısha 2 670 azamatqa qatysty sottan tys bankrottyq rásimdeý bastaldy. Atalǵan kórsetkish barlyq júgingenýshiniń 26% quraıdy. Onyń ishinde ataýly áleýmettik kómek alýshy 375 azamat bar. Sonymen qatar 985 tulǵanyń 5 jyldan astam ýaqyt qaryzyn ótemeı kelgeni anyqtaldy. Boryshkerler týraly málimet elektrondy úkimet veb-portalynda ornalastyrylǵan», – dedi Erjan Birjanov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, 7340 ótinish ıesine sotsyz bankrot dep jarııalaýdan bas tartý jóninde habarlama joldanǵan.

Sondaı-aq, vıtse-mınıstrdiń orynbasary sottan tys bas tartýdyń negizgi sebepterin atap ótti.

- Kredıttik bıýronyń málimeti boıynsha 6713 tulǵada 12 aı ishinde bereshekti ishinara óteýi bar nemese bereshek somasy 1600 AEK-ten asady;

- Eńbek jáne halyqty áleýmettik qorǵaý mınıstrligi 1846 tulǵa boıynsha 6 aı ishinde ataýly áleýmettik kómek alyp kelgenin rastaǵan joq;

- 1463 tulǵa jubaıynyń bar ekenin kórsetpegen, sáıkesinshe olardan rásimdi qoldanýǵa kelisim alǵan joq;

- 1349 tulǵanyń menshiginde jyljymaıtyn múlik bar;

- 941 azamatta jer ýchaskeleri bar;

- 789 azamattyń atyna avtokólik tirkelgen.