7 mln teńgege jýyq qarjy jymqyrǵan mektep basshylyǵyna qatysty sotqa deıingi tergeý bastaldy

<p>ASTANA. KAZINFORM &ndash; Shymkent qalasy Turan aýdanynyń prokýratýrasy tekserý barysynda 6 843 837 teńge somadaǵy bıýdjet qarajatyn jymqyrý faktilerin anyqtady.</p>

Bul aqshalaı qarajat 2022-2023 jyldar aralyǵynda № 73 orta mektepti aǵymdaǵy jóndeý jumystaryn júrgizýge, ǵımaratty jylytyp ustaý úshin kómir jetkizýge bıýdjetten bólingen.

Odan bólek, jumys atqarmaǵanyna qaramastan 2 qyzmetkerge aı saıyn eńbekaqy tólenip otyrǵany belgili boldy (óli jandar).

«Aýdan prokýratýrasy mektep basshylyǵyna qatysty Qazaqstan Respýblıkasy Qylmystyq kodeksiniń 189-baby 3-bóliginiń 1-tarmaǵy (Senip tapsyrylǵan bóten múlikti ıemdený nemese ysyrap etý) boıynsha sotqa deıingi tergep-tekserýdi bastady.

QR QPK 201-babynyń talaptaryna sáıkes basqa aqparat jarııa etýge jatpaıdy», — dep jazdy Turan aýdanynyń prokýratýrasy.