7 qyrkúıek. Jylnama
ATAÝLY KÚNDER
Halyqaralyq ashyq aspan jáne taza aýa kúni
BUU-nyń halyqaralyq jáne dúnıejúzilik kúnderi júıesinde 7 qyrkúıekte atap ótiledi. BUU Bas Assambleıasy 2019 jyly qurǵan.
Kógildir ashyq aspan úshin halyqaralyq taza aýa kúni qoǵamnyń nazaryn aýanyń lastanýy máselesine aýdarý maqsatynda quryldy.
ESTE QALAR OQIǴALAR
1932 jyly Qazaqstanda tuńǵysh ret kóp basylymda gazet pen jýrnal shyǵaratyn arnaıy mamandandyrylǵan «Dáýir» baspasy quryldy.
2001 jyly Aqtaý qalasynda jańa parom termınaly, qalanyń «Yntymaq» alańyndaǵy «Dostyq» monýmenti ashyldy.
2004 jyly Astanada evreılerdiń Ortalyq Azııadaǵy eń úlken «Beıt Rahel – Habad Lıýbavıch» sınagogasy ashyldy.
2009 jyly Astanada Estonııa Respýblıkasynyń Ortalyq Azııadaǵy birinshi konsýldyǵy ashyldy. Saltanatty sharaǵa Estonııa Respýblıkasynyń Premer-mınıstri Andrýs Ansıp, Qazaqstan Respýblıkasynyń Syrtqy ister mınıstrliginiń ókilderi, bıznesmender qatysty.
2010 jyly Eýropa komıssııasynyń álemge tanymal «Berlamon» ǵımaratynda qazaqstandyq zamanaýı óner kórmesiniń saltanatty ashylýy ótti, onda «Has Sanat» galereıasynyń zamanaýı sýretshileriniń týyndylary qoıyldy.
2012 jyly Majarstan astanasy Býdapesht qalasyndaǵy «VAM Design Center» ortalyǵynda tanymal qazaqstandyq sýretshi-restavrator Qyrym Altynbekovtiń jınaǵyndaǵy ejelgi saqtardyń jańartylǵan dúnıelerin kórsetetin «Altyn adam – dala pıramıdalaryndaǵy patshalyq qorymdar dúnıesi» kórmesi ashyldy.
2013 jyly Qazaqstan Prezıdenti Nursultan Nazarbaev jáne QHR tóraǵasy Sı Tszınpın Qazaqstan-qytaı iskerlik keńestiń quryltaı otyrysy barysynda «Beıneý-Bozoı-Shymkent» gaz qubyryn iske qosty.
2016 jyly Qazaqstandyq zertteýshi, Torǵaı geoglıfterin ashqan ǵalym Dmıtrıı Deı álemde balamasy joq qupııa nysandarǵa ekspedıtsııa uıymdastyrýǵa qajetti qarajat jınaý maqsatynda halyqtyq jobanyń bastalǵanyn jarııa etti. Túrkııada ótken Arheologtardyń eýropalyq qaýymdastyǵynyń forýmynda torǵaılyq nysandar 2014 jyldyń basty sensatsııasy dep tanyldy. Al 2015 jyldyń qorytyndysy boıynsha amerıkalyq blogerlerdiń tańdaýymen Torǵaı geoglıfteri jyldyń top-10 jańalyqtarynyń qataryna endi.
2019 jyly D.Serikbaev atyndaǵy Shyǵys Qazaqstan memlekettik tehnıkalyq ýnıversıteti «Altaı – túrki áleminiń altyn besigi» halyqaralyq konferentsııasyn uıymdastyrdy. Oǵan Qazaqstan, Frantsııa, Reseı, Túrkııa, Úndistan, Japonııa jáne Ázerbaıjan arheologtary men túrkitanýshy ǵalymdary, Qazaqstannyń ǵylymı jáne shyǵarmashylyq zııaly qaýym ókilderi qatysty. Іs-shara bastalar aldynda Shyǵys Qazaqstan oblysynyń aýmaǵynda jasalǵan arheologııalyq oljalardyń biregeı ekspozıtsııasy ashyldy. Kórmedegi negizgi eksponattar b.z.d. IV-III ǵasyrlarda ómir súrgen aqsúıek saq áıeliniń beınesin beıneleıtin «Úrjar dinı qyzmetkeri» boldy.
Ekspozıtsııada 2003 jyly professor Ábdesh Tóleýbaev tapqan Shilikti altyn adamy jáne Tarbaǵataı aımaǵyndaǵy Eleke Sazy ústirtindegi arheologııalyq aımaq aýmaǵynan 2018 jyly professor Zeınolla Samashev tapqan Altyn adam bar.
2023 jyly Aqordada Qazaqstanǵa resmı saparmen kelgen Albanııa Prezıdenti Baıram Begaıdy resmı qarsy alý rásimi ótti. Bul Albanııa Prezıdentiniń Qazaqstanǵa jasaǵan alǵashqy sapary. Eki memleket basshylary qurmetti qaraýyl rotasynyń bastyǵynan quttyqtaý raportyn qabyldap, Qazaqstan men Albanııanyń memlekettik ánurandary shyrqaldy. Qasym-Jomart Toqaev pen Baıram Begaı shekteýli quramda kelissózder júrgizdi. Qasym-Jomart Toqaev Albanııa Prezıdentine shaqyrýdy qabyl alyp, Qazaqstan astanasyna kelgeni úshin alǵys aıtty. Qazaqstan tyǵyz qarym-qatynas ornatýǵa óte múddeli jáne ózara tıimdi yntymaqtastyq pen ózara múddeli kóptegen salalarda baılanystardy damytýǵa múmkindikter bar. Albanııa Prezıdenti Qasym-Jomart Toqaevqa Astanaǵa shaqyrǵany jáne kórsetilgen qonaqjaılylyq úshin alǵysyn bildirdi, sondaı-aq ony Albanııaǵa saparmen kelýge shaqyrdy.