7 qarashada Tóleshovtiń isi boıynsha úkim shyǵarylady

ASTANA. QazAqparat - Toqtar Tóleshovtiń isi boıynsha úkim shyǵarylady. «Qylmystyq is boıynsha mamandandyrylǵan aýdanarlyq áskerı sot 2016 jyly 7 qarashada saǵat 16:00-de Tóleshov pen ózge de tulǵalarǵa qatysty qylmystyq is boıynsha úkim shyǵarady», - dep habarlady áskerı sot.

Eske sala keteıik, is materıaldarynda memlekettik qupııalarǵa qatysty derekter bolǵandyqtan, Toqtar Tóleshovtiń soty jabyq túrde ótip jatyr. 2016 jyldyń qańtarynda Shymkentte kúsh qurylymdary arnaıy operatsııa júrgizip, ony qolǵa túsirgen bolatyn. Arada alty aı ótken soń, ıaǵnı, maýsym aıynda Ulttyq qaýipsizdik komıteti resmı málimdeme jasaı otyryp, Toqtar Tóleshovke qarajaty men laýazymyn paıdalana otyryp, bılikti kúshpen basyp alýǵa árekettendi degen aıyp taqty. Bul oıyn júzege asyrý úshin Toqtar Tóleshov quzyrly organdar men áskerı saladaǵy vedomstvolardan sybaılastar tapqan.

Qylmystyq istegi basty jaýapker Toqtar Tóleshev birqatar qylmystar boıynsha aıyptalyp otyr, olardyń arasynda: adam urlaý, óltirý, zańsyz bostandyǵynan aıyrý, bılikti basyp alýǵa jarııa shaqyrý, sondaı-aq bılikti basyp alý nemese QR Konstıtýtsııalyq qurylysyn kúshtep ózgertý, ekstremıstik top qurý, oǵan basshylyq etý nemese onyń qyzmetine qatysý, tonaýshylyq, uıymdasqan qylmystyq top, uıym qurý jáne oǵan basshylyq etý sııaqty aıyptar taǵylǵan. Sondaı-aq ol qarýlardyń, oq-dárilerdiń, jarylǵysh zattardyń jáne jarylǵysh qurylǵylardyń  zańsyz aınalymyna aıyptalýda. Sonymen birge, Tóleshovtiń ótkizý maqsatynsyz esirtki zattarynyń zańsyz aınalymyna qatysy bar ekendigi jóninde aıyp taǵylýda.