7 aıda Qazaqstandaǵy JІÓ ósimi 1,5%-ǵa tómendedi - B.Saǵyntaev

ASTANA. QazAqparat - Búgin Memleket basshysy Nursultan Nazarbaevtyń tóraǵalyǵymen Aqordada ekonomıkalyq saıasattyń júıeli sharalary týraly keńes ótti, dep habarlaıdy Prezıdenttiń baspasóz qyzmeti.

Keńeste sóz alǵan Premer-Mınıstrdiń birinshi orynbasary Baqytjan Saǵyntaev álemdik ekonomıkadaǵy jaǵdaıdyń qıyndaýyna baılanysty, osy jyldyń 7 aıynda eldegi JІÓ ósimi 1,5%-ǵa tómendegenin atap ótti. Sonymen qatar, Premer-Mınıstrdiń birinshi orynbasary atap ótkendeı, Reseı rýbliniń qunsyzdanýy otandyq azyq-túlik ónerkásibi men aýyl sharýashylyǵyn óndirýshilerdiń jumysynda qosymsha qıyndyqtar týǵyzǵan.

«Osyǵan baılanysty, sál erterek ósimdik sharýashylyǵyna baǵyttalǵan 6 mlrd teńge sút, qus eti, jumyrtqa, shoshqa etiniń óndirisin sýbsıdııalaýǵa qaıta bólinetin boldy. Osynyń arqasynda, óndiris kólemin 10 paıyzdan joǵarylatyp, qus sharýashylyǵy boıynsha 12 myńnan asa jumys ornyn saqtap qala alamyz», - dedi B.Saǵyntaev.

Sonymen qatar, B.Saǵyntaev atap ótkendeı, salalyq baǵdarlamalarǵa bólingen qarjynyń ıgerilýine monıtorıng jasalǵan.

«Biz «Nurly jol» baǵdarlamasy boıynsha 73 mlrd teńgeniń ıgerilmeı qalý qaýpin anyqtadyq. Sondyqtan, bul qarajatty tıimdi júzege asyrylyp jatqan baǵyttarǵa bólip berýdi jón sanadyq. Mysaly, 8,8 mlrd teńge «Astana-Pavlodar-Óskemen» tas jolynyń qurylysyna qaıta bólinedi. Taǵy 6,6 mlrd teńgeni Turǵyn-úı kommýnaldyq keshenin jańǵyrtýǵa bólýdi kózdep otyrmyz»,-dep atap ótti B.Saǵyntaev.