7-20-25: Taraz turǵyndary úshin 686 páter daıyn tur
Bul týraly Jambyl oblysynyń ákimi Asqar Myrzahmetov Astanada Ortalyq kommýnıkatsııalar qyzmetinde ótken baspasóz máslıhatynda aıtty.
A. Myrzahmetov árbir otbasyna baspana alýdyń jańa múmkindikterin berýge arnalǵan Bes áleýmettik bastamanyń birinshi baǵyty aıasynda birqatar jobalar iske asyrylyp jatqanyn jetkizdi.
«Taraz qalasyndaǵy qajetti ınfraqurylymmen qamtamasyz etilgen 462 gektar aýmaqta jańa eki shaǵyn aýdannyń qurylysy bastaldy. Atalǵan aýdandarda «7-20-25» baǵdarlamasy boıynsha usynylatyn 480 kóp qabatty jáne 969 jeke turǵyn úı qurylystary bastalady. Bıyl kóppáterli 10 turǵyn úı (800 páter), 2019 jyly - 25 turǵyn úı (1 380 páter) paıdalanýǵa beriledi», - dep atap ótti A. Myrzahmetov.
Onyń aıtýynsha, ıpotekalyq nesıeniń alǵashqy jarnasynyń 30 paıyzdan 20 paıyzǵa tómendeýine baılanysty, páter alýǵa múmkindigi bar azamattardyń sany 3 esege artqan.
Qazirgi ýaqytta «7-20-25» baǵdarlamasy arqyly Taraz qalasynda 686 páter azamattarǵa usynýǵa daıyn.
«Kelesi jylǵa jalpy oblys boıynsha 465 myń sharshy metr turǵyn úı qurylysy josparlanyp otyr. Josparda bıýdjet esebinen 28 kóppáterli turǵyn úıdiń jáne 6 jańa alqaptyń ınjenerlik ınfraqurylymnyń qurylystary bar. Sonyń ishinde, 20 úıdi «7-20-25» baǵdarlama aıasynda turǵyndarǵa berý kózdelip otyr», - deıdi Asqar Myrzahmetov.