«7-20-25»: Pavlodarda 1 mln teńgelik sertıfıkattar berile bastaıdy
Bul týraly Memleket basshysynyń Joldaýyn túsindirý boıynsha qala turǵyndarymen ótken kezdesý barysynda qala ákiminiń orynbasary Saıan Muqanov aıtty.
«Búginde atalmysh baǵdarlamanyń baıaý iske asyp jatqany belgili. Osyǵan deıin jumys istegen eshbir ıpotekalyq ónim mundaı qolaıly nesıelendirý erejelerine ıe bolǵan emes jáne de biz bul baǵyttaǵy jumysymyzdy kúsheıtemiz», - dedi Saıan Muqanov.
Jas otbasylar men bıýdjettik sala qyzmetkerleriniń bastapqy naryqtaǵy baspana satyp alýy boıynsha qarjylyq aýyrtpalyqtaryn tómendetý maqsatynda «Baspana» ıpotekalyq kompanııasy «Jas arman» jáne «Qamqor baspana» baǵdarlamalaryn usynǵan. Bul rette «7-20-25» baǵdarlamasy boıynsha bastapqy jarnanyń bir bóligi memleket tarapynan óteledi. Qala ákimi orynbasarynyń sózinshe, jaqyn arada bastapqy jarnanyń bir bóligin óteıtin bir mıllıon teńgelik turǵyn úı sertıfıkattary berile bastaıdy.
«Bul baǵdarlamaǵa bıýdjettik salanyń barlyq qyzmetkerleri qatysa alady. Qazirgi tańda atalǵan baǵdarlamanyń júzege asyrylýy úshin oblystyń qalalarynda 305 páter bar. Jyl sońyna deıin oǵan taǵy 200-den astam páter qosylady. Keńirek aqparat alý úshin qalalyq qarjy bólimine júginýge bolady», - deıdi Saıan Muqanov.
« Budan ózge «Nurly jol» baǵdarlamasy aıasynda bıyl qalamyzda 200 myń sharshy metr baspana salý josparlanýda. 2021 jylǵa qaraı «Saryarqa» móltek aýdany tolyǵymen paıdalanýǵa beriledi. Kelesi jyly «Dostyq» móltek aýdanynyń qurylysy bastalady. Mundaǵy turǵyn úılerdiń jalpy aýdany 470 myń sharshy metrdi quraıtyn bolady.