«7-20-25»: Mańǵystaýda merekege oraı jeńildikter jasalady

AQTAÝ. QazAqparat - Aqtaýda Táýelsizdik kúnine oraı «7-20-25» baǵdarlamasy boıynsha úı alatyndarǵa merekelik jeńildik jasalady. Bul týraly Mańǵystaý oblysynyń Óńirlik kommýnıkatsııalar qyzmetinde ótken brıfıngte málim boldy, dep habarlaıdy QazAqparat tilshisi.

Bes birdeı qurylys kompanııasy 5 jáne 10 paıyz aralyǵynda turǵyndarǵa tıimdi usynyspen úı alýǵa múmkindik berip otyr. Qazirgi ýaqytta qala aýmaǵynda 5 qurylys kompanııasy turǵyn úı qurylysyn aıaqtap, 400 páterdi «70-20-25» baǵdarlamasy aıasynda satýǵa daıyn. Sondaı-aq aldaǵy 15 jeltoqsan kúni «Aq qala moll» saýda, oıyn-saýyq ortalyǵynda qurylys mekemeleriniń, ekinshi deńgeıli bankter ókilderiniń qatysýymen jármeńke ótkizý josparlanǵan. Onda turǵyndarǵa jeńildik sharttary túsindirilmek.

«Qazirgi ýaqytta Aqtaý qalasynda 24 ýchaskede komertsııalyq baspana qurylysy júrgizilip jatyr. Qazirgi tańda «7-20-25» baǵdarlamasy boıynsha ekinshi  deńgeıli bankterge 2 mlrd 929 mln teńgege 378 ótinim kelip tústi. 1 mlrd 935 mln teńgeniń 238 ótinimi maquldandy. Búginde Aqtaýda osy baǵdarlama arqyly beriletin daıyn turǵan páterler bar»,- dedi Mańǵystaý oblycynyń Qurylys, sáýlet jáne qala qurylysy basqarmasy bólim basshysynyń mindetin atqarýshy Imammahmýt Shaǵyrbaev.