7-20-25: Qaıtalama naryqtaǵy páterlerdiń ıpotekasy ózgeshe bolady

ASTANA. QazAqparat - «7-20-25» ıpotekalyq baǵdarlamasy aıasynda ázirshe jańa baspanaǵa nesıe beriledi. Aldaǵy ýaqytta atalǵan júıe arqyly qaıtalama naryqtaǵy páterlerdi satyp alý tetikteri ázirlenetin bolady. Biraq onyń sharttary ózgeshe bolady, dep xabarlaıdy QazAqparat tilshisi.

QR Ulttyq banki tóraǵasynyń orynbasary Oleg Smolıakovtyń aıtýynsha, «Baspana» atty ıpotekalyq kompanııa birneshe baǵytta jumys isteıtin bolady. Bastapqyda jańa páterler ıpotekaǵa beriledi. Odan keıin qaıtalama naryqtaǵy páterlerdi satyp alý baǵyty júzege asady.

«Baspana» kompanııasynyń aldynda úlken maqsat tur. Ol ıpotekalyq naryqqa serpin berýi tıis. Árıne, ıpoteka ishinde qaıtalama naryqtaǵy páterler de bar. Sondyqtan aldaǵy ýaqytta biz qosymsha paketterdi de ázirleýdi josparlap otyrmyz. Onyń ishinde qaıtalama naryqtaǵy páterlerge ıpoteka berý tetigi de bolady. Ony sál keıinirek jasaımyz. Shamamen, eki-úsh aıdan keıin iske ázirleıtin shyǵarmyz», - dedi O.Smolıakov jýrnalısterge bergen suxbatynda.

Onyń aıtýynsha, qaıtalama naryqtaǵy páterlerdi satyp alýdyń sharttary ózgeshe bolady. Sebebi atalǵan baǵyt áleýmettik bastamaǵa jatpaıdy. «Alǵashqy jarna 20 protsentten joǵary bolatyn shyǵar. Sosyn nesıeniń mólsherlemesi de 7 protsent bolmaıdy. Onyń mólsheri naryqtyq talaptarǵa jaqyn bolýy yqtımal. Biraq bankterdiń 14-15 protsentinen tómen bolýy kerek. Álbette, jeńildik bolady. Biraq «7-20-25»-ten ózgeshe», - dep atap kórsetti O.Smolıakov.