7-20-25: Qaı qala kósh basynda?

ALMATY. QazAqparat - Almaty 7-20-25 baǵdarlamasy boıynsha eń kóp nesıe bergen qalalardyń kóshin bastap tur, dep habarlaıdy QazAqparat tilshisi qalalyq Sáýlet jáne qala qurylysy basqarmasyna silteme jasap.

Feısbýkte jarııalanǵan aqparatqa sáıkes, Almatyda 312 ótinim maquldanǵan.

«2018 jyldyń 9 tamyzdaǵy ahýalǵa sáıkes qalada jalpy quny 6,6 mlrd teńge bolatyn 522 ótinim berilgen. Barlyǵy 312 ótinim maquldandy. Al, jalpy Qazaqstan boıynsha 315 ótinim boıynsha nesıe berildi. Onyń 128-i Almaty turǵyndaryna berildi. Bul respýblıka boıynsha 44 paıyzdy quraıdy», - delingen jazbada.

Aıta ketsek, QR Ulttyq banki tóraǵasy atalǵan baǵdarlamanyń operatory «Baspana» ıpotekalyq uıymy  bolatynyn 5 mamyrda aıtqan edi. Ulttyq bank bekitken baǵdarlama boıynsha ıpotekalyq qaryzdar 7% jyldyq mólsherlememen 25 jylǵa beriledi. Kelesi sharttarynyń biri - alǵashqy salym 20% bolmaq. Jańa ıpotekalyq zaımdardy QR kez kelgen azamat ala alady. Ol úshin eń basty shart - adamnyń basynda jyljymaıtyn múlki bolmaýy kerek. Baǵdarlama boıynsha Qazaqstannyń kez kelgen óńirinen Almaty, Astana, Atyraý qalalarynan eń maksımaldy 25 mln teńgege, qalǵan óńirlerde 15 mln teńgege baspana satyp alýǵa bolady.

Klıentter Bank Tsentrkredıt, Evrazııa banki, ATF bank, bank RBK, Halyq banki, Tsesnabank, Turǵyn úı qurylys jınaq banki arqyly nesıe ala alady.  Jyl sońyna deıin bul tizimge Sberbank pen Forte bank qosylýy múmkin.