«7-20-25»: Qaraǵandy ákimi monoqalalarda baspana salýdy tapsyrdy

QARAǴANDY. QazAqparat - Qaraǵandy oblysynyń keı aımaqtarynda «7-20-25» baǵdarlamasy tolyq kólemde júzege asyrylyp jatqan joq, dep habarlaıdy QazAqparat tilshisi oblys ákiminiń resmı ınternet-resýrsyna silteme jasap.

Oblys ákimi Erlan Qoshanov atalǵan baǵdarlama boıynsha spýtnık-qalalarda baspana salý jóninde tapsyrma berdi.

«Jezqazǵan men Balqashta «Nurly jer» baǵdarlamasy boıynsha turǵyn úıler salynyp jatyr. Oblystyq bıýdjettiń qoldaýynyń arqasynda bul úılerdegi bir sharshy metr baspananyń quny 90-100 myń teńge tóńireginde. Bul - satyp alýshylar úshin tartymdy baǵa. Shaǵyn qalalarda satyp alý qabileti oblys ortalyǵyna qaraǵanda tómen ekenin eskerý kerek. Oblystyń kómegimen «7-20-25» baǵdarlamasynyń talaptaryna saı keletin jáne satyp alýshynyń qaltasyn qaqpaıtyn arzan turǵyn úıler salýǵa bolar edi. Temirtaý, Balqash jáne Jezqazǵanda bizdiń banktiń salymshylary az emes, olarǵa bul usynys unaıtyny sózsiz», - deıdi «Turǵyn úı qurylys jınaq banki» AQ Qaraǵandy fılıalynyń dırektory Baýyrjan Jýaspaev.

Erlan Qoshanov bul oıdy quptap, atalmysh baǵdarlamaǵa qatysyp jatqan qurylys kompanııalaryn qoldaýǵa daıyn ekenin aıtty.

«Biz oblystyq bıýdjet esebinen qurylysqa qarjy bólýge daıynbyz. Sizderge tek óz jumystaryńyzdy atqarý ǵana qaldy! Úı salsańyzdar, satyp alýshylar tabylady ǵoı», - dedi aımaq basshysy.

Aıta ketý kerek, bıyl Jpezqazǵanda kópqabatty eki úı paıdalanýǵa beriledi. Onyń bireýi - jaldaýǵa arnalǵan baspana bolsa, ekinshisi nesıege beriledi. Taǵy bes úıdiń jobalyq-smetalyq qujattary ázirlengen. Kelesi jyly kóppáterli eki úıdiń qurylysy bastalady.

Balqashta da bıyl 4 turǵyn úı salynyp jatyr. Taǵy eki úıdiń ınjenerlik kommýnıkatsııalary júrgizilip, jobalyq-smetalyq qujattary jasalyp qoıǵan.