7-20-25: Boryshkerlerdiń 60 paıyzynyń aı saıynǵy tólemi 100 myń teńgege jetpeıdi

ALMATY. QazAqparat - 7-20-25 baǵdarlamasy arqyly ıpoteka alǵandardyń basym kópshiliginiń tólemi aıyna 100 myń teńgege jetpeıdi, dep habarlaıdy QazAqparat «Baspana» ıpotekalyq uıymyna silteme jasap.

«Baspana» ıpotekalyq uıymy mamandar esebinshe zaım alýshylardyń 60% aı saıyn 100 myń teńgeden kem soma tóleıdi.

Bul rette 7-20-25 baǵdarlamasy boıynsha zaım alýshylardyń 6% ǵana eń joǵary somany nesıege alǵan (Astana, Almaty, Atyraý, Aqtaý jáne Shymkent qalalarynda 20 mln teńge, basqa aımaqtarda 12 mln). Zaım basym bóligi, al bul jalpy portfeldiń 37%, 10-nan 15 mıllıon teńgege deıingi somada nesıe rásimdegen.

«Baǵdarlama óziniń áleýmettik baǵdaryn tolyqtaı rastady. Alaıda 7-20-25 eń aldymen merzimdilik, tólem qabilettilik jáne qaıtarym prıntsıpterine negizdelgen ıpoteka ekendigin umytpaýymyz kerek. Ol bank aldynda óziniń tólem qabiletin dáleldegen, jumys isteıtin qazaqstandyqqa qoljetimdi», - dedi «Baspana» ıpotekalyq uıymy basqarma tóraǵasy Qaırat Altynbekov.

24 qazan kúngi jaǵdaı boıynsha, 7-20-25 baǵdarlamasy boıynsha bir de bir qaıtarylmaǵan qaryz joq. Qazaqstandyqtar  jalpy jınyny 44,5 mlrd teńgeniń nesıesine ótinish bergen. Bankter onyń ishinen somasy 30 mlrd teńge bolatyn 2 513 ótinimdi maquldaǵan.