«7-20-25» baǵdarlamasyn jalǵastyra berý kerek - Marat Qarabaev

ASTANA. QazAqparat – «7-20-25» ıpotekasyna túsken ótinishterdi qanaǵattandyrý úshin qosymsha 600 mlrd teńgeden astam qarajat kerek. Indýstrııa jáne ınfraqurylymdyq damý mınıstri Marat Qarabaev Úkimet otyrysynan keıin BAQ ókilderine osyndaı málimet berdi, dep habarlaıdy QazAqparat tilshisi.

«2-10-20» men «5-10-20»-ǵa bıyl taǵy da 70 mlrd teńge bóldik. Al úshinshi baǵyt – eshqandaı kezekte joq, zaýytta isteıtinder sııaqty qarapaıym kisilerge arnalǵan «7-20-25» baǵdarlamasy. Ol baǵdarlama boıynsha 116 myń ótinish túsken bolsa, sonyń 65 myńy qazir qanaǵattandyrylǵan. 870 mlrd teńge ıgerilgen. Jalpy, baǵdarlama boıynsha 1 trln teńge bólý qarastyrylǵan», - dedi mınıstr.

Onyń aıtýynsha, halyqtyń bul ıpotekaǵa degen suranysyn qanaǵattandyrý úshin qosymsha 600 mlrd teńge kerek.

«Bul qarajat bólinedi nemese bólinbeıdi dep naqty aıta almaımyn. Óıtkeni, baǵdarlama jalpy Ulttyq banktiń esebinen qarastyrylǵan. Bizdiń mınıstrlik tarapynan ózimizdiń ustanymymyz – baǵdarlamany jalǵastyrý kerek. Óıtkeni tıimdi, halyqtyń qalaýy bar», - dedi Marat Qarabaev.

Eske salsaq, buǵan deıin Ǵalymjan Pirmatov atalǵan baǵdarlama týraly aıta kelip, Ulttyq bank ondaı jobalardy qarjylandyrýdan neǵurlym tezirek ketse, soǵurlym durys ekenin aıtqan edi.