«7-20-25» baǵdarlamasy: Qazaqstanda qansha turǵyn úı beriledi

ASTANA. QazAqparat - QR Investıtsııalar jáne damý mınıstri Jeńis Qasymbek «7-20-25» baǵdarlamasy boıynsha Qazaqstanda qansha turǵyn úı beriletinine qatysty suraqqa jaýap berdi, dep habarlaıdy «QazAqparat» HAA tilshisi.

«7-20-25» baǵdarlamasy boıynsha negizinen Ulttyq bank jumys atqarady. Biraq, biz de negizinen kómektesip, birlese jumys júrgizip jatyrmyz. Ol baǵdarlama boıynsha qansha páter salynady, qansha páter ıpotekaǵa beriledi degen másele bylaı sheshiledi. Qazir Ulttyq bank "Qaı óńirde osy baǵdarlama boıynsha suranys bar?" degen suraqty taldap jatyr. ıAǵnı, ol oblystardyń tutynýshylyq qabiletine baılanysty», - dedi mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, páter quny óńirlerde ártúrli. Mysaly, Oralda, Qostanaıda, Petropavlda 10 mln teńgege 2 bólmeli úı satyp alýǵa múmkindik bar. Almatyda 70-80 sharshy metrlik baspanaǵa 10 mıllıon teńge jetpeıdi.

«Sondyqtan, qazir sol másele sheshilip jatyr. Bizdiń oıymyzsha, 70 myń páterden 100 myń páterge deıin osy baǵdarlama arqyly qazaqstandyqtardyń ıpoteka alýyna múmkindik bar. Bul 4,5 jyldyń ishinde atqarylatyn jumys», - dep túıdi mınıstr.