«7-20-25» baǵdarlamasy boıynsha pavlodarlyqtardan birde-bir ótinish túspegen

PAVLODAR. QazAqparat - Pavlodar oblysynyń turǵyndary arasynda «7-20-25» ıpotekalyq baǵdarlamasynyń sharttaryn túsindirý jumystary júrgizilýde. Bul týraly Óńirlik kommýnıkatsııalar qyzmetinde ótken baspasóz máslıhatynda «Qazaqstan turǵyn úı qurylys jınaq banki» AQ Pavlodar oblystyq fılıalynyń dırektory Talǵat Baılov aıtty, dep habarlaıdy QazAqparat pavlodarnews.kz saıtyna silteme jasap.

«Atalmysh baǵdarlama aıasynda búgingi kúnge deıin birde-bir ótinish túsken joq. Degenmen, ótinishterdi qabyldaýǵa daıynbyz», - dedi Talǵat Baılov.

Atap ótilgendeı, BASPANA.KZ  portaly arqyly tegin ótinish berip, elimiz boıynsha kez kelgen óńirden páter tańdaýǵa bolady. Qajetti qujattar tizimi Turǵyn úı qurylys jınaq bankiniń saıtynda kórsetilgen.

«Pavlodarda Abaı kóshesi, 75, Ekibastuzda Stroıtelnaıa kóshesi, 80 mekenjaıy  boıynsha jáne Aqsý qalasynda «Astana» saýda úıinde menedjerler  jumys isteıdi. Sondaı-aq, oblys boıynsha banktiń shtattan tys 60 keńesshisi bar», - deıdi ol.

«7-20-25» baǵdarlamasy aıasynda satyp alynatyn baspana qoldanysqa engiziligen ári birinshi naryqtaǵy úı bolýy tıis. Mundaı nysandar Pavlodar qalasy boıynsha Táýelsizdik  dańǵyly jáne Sývorov kóshesinde, sondaı-aq  Ekibastuz qalasynda  bar.  Qaryzǵa beriletin eń joǵary soma 15 mıllıon teńgeni quraıdy. Eger de turǵyn úıdiń baǵasy odan joǵary bolǵan jaǵdaıda baspana alýshy ústinen ózi qarajat qosa alady.  ıAǵnı, 20 paıyz alǵashqy jarnanyń ústine 12 mıllıon teńgeni bank usynady.