«7-20-25» baǵdarlamasy boıynsha ıpoteka berý qashan bastalady

ASTANA. QazAqparat - QR Investıtsııalar jáne damý mınıstri Jeńis Qasymbek Memleket basshysynyń «7-20-25» bastamasyn júzege asyrý sharalaryna túsinik berdi, dep habarlaıdy QazAqparat.

«Qazirgi kezde «Nurly jer» baǵdarlamasyna túzetýler engizilýde. Bul sharalar jańa «7-20-25» baǵdarlamasyna qosymsha ınfraqurylymnyń qajettigine baılanysty jasalyp otyr. Sondyqtan atalǵan baǵdarlama aıasynda qosymsha jumystar josparlanyp otyr», - dedi mınıstr Úkimet otyrysynan keıin.

Onyń sózine qaraǵanda, ıpotekalyq zaımdardy berý ekinshi jartyjyldyqtan bastap josparlanǵan.

«Ulttyq bank eki aıdyń ishinde baǵdarlamany bekitip, ekinshi jartyjyldyqtan osy ıpotekany berýdi bastaıdy. Bul turǵyda jańa turǵyn úıler eskerilip otyr», - dedi vedomstvo basshysy.

Budan bólek, ol «Nurly jer» baǵdarlamasy ary qaraı jalǵasatynyn atap ótti.

«Nurly jer» baǵdarlamasy sátti iske asyrylyp jatyr. Jeke turǵyn úı qurylysyn qoldaý, nesıelik ári arendalyq baspana, ıpoteka burynǵysynsha saqtalady», - dedi J. Qasymbek.

Prezıdenttiń Bes áleýmettik bastamasynyń biri «7-20-25» ıpotekalyq baǵdarlamasyn iske asyrýǵa baılanysty «Nurly jer» turǵyn úı baǵdarlamasyna ózgerister engiziletini týraly buǵan deıin habarlaǵan bolatynbyz.