«7-20-25» baǵdarlamasy bizge básekeles emes - Lázzat Ibragımova

ASTANA. QazAqparat - «Qazaqstannyń Turǵyn úı qurylys jınaq banki» «7-20-25» baǵdarlamasyna nege qatyspaıdy. Bul saýaldyń jaýabyn búgin Úkimet úıinde ótken baspasóz máslıhatynda banktiń basqarma tóraǵasy Lázzat Ibragımova berdi, dep habarlaıdy QazAqparat tilshisi.

«Biz klassıkalyq ıpotekalyq bank emespiz. Biz - turǵyn úı qurylys jınaqtaýshymyz. Júıemiz mynadaı, alǵashqy jarnama 20 paıyz bolyp, adam 50 paıyzyn jınasa da, tipti nesıesi bolsa da turǵyn úı zaemynyń tómendetilgen stavkasyna kóshýi tıis. Al «7-20-25» baǵdarlamasynda stavka 25 jyl boıy 7 paıyz bolyp belgilengen. Al bizde jyldyq ne 5 paıyzǵa, ne 3,5 paıyzǵa aýysý únemi bolyp turady», - dedi bank basshysy.

Degenmen, ol «7-20-25» baǵdarlamasyna qatysýdyń ońtaıly joldary osy jyldyń 1 jartyjyldyǵynda tabylyp qalýy múmkin ekendigi de aıtty. Onyń sózine qaraǵanda, atalǵan baǵdarlama iske qosylǵannan keıin de bank salymshylarynyń eshqaısysy óz qarajattaryn alyp ketpegen.

«Óıtkeni, kommertsııalyq bankterdiń tólem qabiletti baǵalaýy kirisi 300 myń teńgeden asatyn adamdarǵa ǵana ótýge múmkindik beredi. Al biz kirisi tipti 250 myń teńgeden de tómen halyqpen jumys isteımiz. Sondyqtan salymshylarymyzǵa tólem qabiletin baǵalaýdan ótýge keńes beremiz. Ádette olar bas tartýǵa tap bolyp, bizge oralyp jatady», - dedi Lázzat Ibragımova.

Onyń aıtýynsha, 2018 jyly «Qazaqstannyń Turǵyn úı qurylys jınaq bankinde» 380 jańa depozıt ashylǵan.

«Kommertsııalyq bankter bas tartqandar bizde kirisi 200 myń, 150 myń teńgeden de tómen adamdardyń zaem men nesıe alǵandyǵyn kórip, «Qazaqstannyń Turǵyn úı qurylys jınaq bankine» kelip jatyr», - dedi ol.

Onyń sózine qaraǵanda, «Qazaqstannyń Turǵyn úı qurylys jınaq bankinde» «7-20-25» baǵdarlamasyna uqsas sharttar da bar. Atalǵan shartqa sáıkes bastapqy 20 paıyz jarna jınaǵan azamattarǵa nesıe jylyna 7 paıyzdyq stavkamen beriledi.