«7-20-25» baǵdarlamasy: 57 myńǵa jýyq ótinim qabyldandy

NUR-SULTAN. QazAqparat – Ekonomıkany qoldaý úshin Memleket basshysynyń daǵdarysqa qarsy bastamalaryn iske asyrý jalǵasýda. Bul týraly QR Ulttyq bankiniń tóraǵasy Erbolat Dosaev aıtty, dep habarlaıdy QazAqparat tilshisi.

«Atap aıtqanda, «Qarapaıym zattar ekonomıkasy» baǵdarlamasy turǵysynda bıylǵy 9 sáýirdegi jaǵdaı boıynsha ekinshi deńgeıdegi bankterge 1,1 tlrn teńgege 1 472 ótinim kelip tústi, bankter 607,3 mlrd teńgege 874 qaryz berdi», - dedi UB basshysy Úkimet otyrysynda bıylǵy qańtar-naýryzda eldiń áleýmettik-ekonomıkalyq damý qarqynyn talqylaý kezinde.

Onyń aıtýynsha, kásipkerlik sýbektilerin jeńildikpen kredıtteý baǵdarlamasy boıynsha bıylǵy 9 sáýirdegi kezeńde kásipkerler 745,6 mlrd teńgege 2 956 ótinim jasady. 751,2 mlrd teńgege 7 532 qaryz berildi, onyń ishinde buryn berilgen qaryzdardy óteýden túsken aqsha esebinen 178,9 mlrd teńgege 2 863 qaryz berildi.

«2021 jylǵy 2-toqsanda qarajatty tolyq ıgerý kútilip otyr, 2021 jyldyń qorytyndysy boıynsha 800 mlrd teńgege 8 500 jobany qarjylandyrý eskerilgen», - dedi Dosaev.

Budan bólek ol «7-20-25» baǵdarlamasy aıasynda 2021 jylǵy 8 sáýirdegi jaǵdaı boıynsha 681,3 mlrd teńgege 56 994 ótinim qabyldanyp, onyń ishinde 308,8 mlrd teńgege 26 010 qaryz berilgenin aıtty.

«Al «Baspana Hıt» naryqtyq ıpotekalyq baǵdarlamasy baǵytynda 2021 jylǵy 8 sáýirdegi jaǵdaı boıynsha 1,1 tlrn teńgege 119 103 ótinim alyndy, 451,3 mlrd teńgege 50 109 qaryz berildi. Baǵdarlamany qarjylandyrýdy 600 mlrd teńgege deıin ulǵaıtýdy eskere otyryp, onyń ıgerilýin 2021 jyldyń soǵyna deıin aıaqtaý eskerilgen», - dedi UB basshysy.