«7-20-25»: Atyraý oblysynda 10 otbasy pəter ıesi atandy
Óńirlik kommýnıkatsııalar qyzmetiniń habarlaýynsha, Memleket basshysynyń bes əleýmettik bastamasyn iske asyrý aıasynda «7-20-25» qoljetimdi baspana baǵdarlamasy bastalǵan bolatyn. Baǵdarlamany iske asyrý boıynsha jumystardy Ulttyq bank shilde aıynda iske qosty, búgingi kúni Atyraý oblysynda 10 otbasy pəterge ıe bolyp, 16 úmitker oń sheshim aldy.
«Men «7-20-25» baǵdarlamasynyń arqasynda TsentrKredıt bankiniń kómegimen bes jylǵa Nursaıa yqshamaýdanynan úsh bólmeli pəter aldym. Aldymen, siz pəterdiń aýdanyn tańdaısyz, sodan soń qurylys salýshymen aldyn ala shart resimdeısiz. Sodan keıin shartty bankke aparasyz, ol jerde qujattar tórt kúnniń ishinde qaralady. Maquldaǵannan keıin notarıýsqa barasyz. Qujattarmen barlyq jumysqa tórt-bes kúnińiz ketedi»,- deıdi «7-20-25» memlekettik baǵdarlamasy boıynsha pəter alǵan Erbol Esenǵarın.
Ulttyq banktiń Atyraý fılıaly dırektorynyń mindetin atqarýshy Serik Omarovtyń aıtýynsha, osy baǵdarlama aıasynda ekinshi deńgeıdegi 7 bank jumys isteıdi. Búgingi kúni «TsentrKredıt» banki ıpotekalyq nesıe berýdi bastady. Atap aıtar bolsaq, Eýrazııalyq bank, ATF, Turǵyn-úı qurylys jınaq banki, Halyq banki, RBK banki jáne Tsesnabank tamyz aıynyń sonynda nesıe berýdi bastaıdy.
Aıta ketelik, 2018 jyly oblysta 3892 páterlik 44 kópqabatty turǵyn úıdiń qurylysy bastaldy, bıylǵy jyly 34 úı paıdalanýǵa beriledi. Oblys ortalyǵynda 39 úı salynsa, qalǵany aýdandarda. Sondaı-aq, bul turǵyn úı qurylysynyń rekordtyq kórsetkishi, bul aımaqtaǵy táýelsizdik jyldaryndaǵy eń úlken kólem. Sarapshylardyń pikirinshe, turǵyn úı qurylysynyń mundaı ósýi jyljymaıtyn múlik naryǵyndaǵy baǵalardyń tómendeýine oń áser etedi.