7-20-25: Aqtóbede 147 adam baspanaly bolady
Tamyz aıynan beri Aqtóbe qalasynda «7-20-25» memlekettiń baǵdarlamasy iske asyrylyp keledi. Bankter men qurylys kompanııalary birlesip tanystyrylym ótkizdi. Keıin iri kompanııalardyń jumysshylaryna baspanaly bolýdyń joldary kórsetildi. Bıyl barlyǵy 1,2 mıllıard teńgeniń 147 ótinishi maquldandy.
«Aqtóbelikterdiń kóbi jańa baǵdarlamamen «Batys-2» yqsham aýdanynan páter alyp jatyr. Qazir qalada 25 qurylys kompanııasy bar. Olar osy shaǵyn aýdanda 2 169 páter salyp, paıdalanýǵa berýge ázir», - dedi qala ákimi Іlııas Ispanov óz esebinde.
Aıta keteıik, Aqtóbe qalasyndaǵy «Nur Aqtóbe» yqsham aýdanynda bıyl 1 602 páterdi paıdalanýǵa berý josparlandy. Barlyǵy toǵyz qabatty 6 kópqabatty úı Turǵyn úı qurylys jınaq banki júıesi boıynsha paıdalanýǵa beriledi. Bul úılerdiń qurylysy 2017 jyly bastaldy. Sonymen qatar, «Nurly jer» baǵdarlamasy aıasynda 3, 4, 5 qabatty 36 turǵyn úıdiń qurylysy júrip jatyr. Munda barlyǵy 1 695 páter bolady. Bıyl onyń 354 páteri qoldanysqa beriledi. Degenmen ınjenerlik jeli men kógaldandyrý jumystaryna ýaqytyly qarjy bólinbeı adamdar satyp alǵan páterine kire almaı otyr. Sonymen qatar, bul faktor páterlerdiń ýaqytyly satylýyna keri áserin tıgizdi.
«Qala bıýdjetinde bul maqsatqa qarjy qarastyrylmaǵan, bólinbegen. Injenerlik jeliler men kógaldandyrý jumystary kesh júrip, bul páterler satylýyna keri áserin tıgizip tur. Qazirgi kezde 630 páter men daıyn turǵan 100 kottedj satylmady», - dedi Іlııas Ispanov.
Bul tyǵyryqtan shyǵý úshin qalalyq máslıhat 250 mıllıon teńge qarjy bóldi. Bári kezekte turǵan adamdardyń baspanaly bolýyna yqpal etetin shara. Ári oblys ákimdigi men Turǵyn úı qurylys jınaq banki alǵashqy jarnanyń 10 paıyzyn sýbsıdııalaýǵa kelisti.