«7-20-25»: Aqmola oblysynda 171 nesıe maquldandy

KÓKShETAÝ. QazAqparat - Aqmola oblysynda «7-20-25» memlekettik baǵdarlamasy sheńberinde jalpy somasy 1,5 mıllıard teńgege 171 nesıe maquldandy. Bul týraly óńirlik kommýnıkatsııalar qyzmetinde ótken brıfıngte QR Ulttyq banki Aqmola oblystyq fılıaly dırektorynyń orynbasary Gúlnár Omarova aıtty, dep habarlaıdy QazAqparat tilshisi.

Bank ókiliniń aıtýynsha, shildeniń 4-nen bastap, qolǵa alynǵan «7-20-25» memlekettik baǵdarlamasy aqmolalyqtardyń qyzyǵýshylyǵyn arttyrýda.

«Búgingi kúnge deıin  Qazaqstannyń barlyq aımaqtarynan 55 mıllıard teńge somasyna 4657 ótinish kelip túsken. Onyń ishinde bankter tarapynan barlyǵy 36 mıllıard teńgege nesıe maquldanǵan. Aımaqtar boıynsha aıta ketsek, Almaty, Astana jáne Mańǵystaý oblystary kósh bastap tur. Baǵdarlama qarqyny Aqmola oblysynda da jaman emes. Aqmola oblysy boıynsha boıynsha 1,98 mıllıard teńge somasyna 222 ótinish kelip tústi. Onyń ishinde barlyǵy 1,5 mıllıard teńgege 171 nesıe maquldandy. Bul kórsetkish boıynsha Aqmola oblysy respýblıkadaǵy 17- óńirdiń ishinde 5-shi orynda tur», dedi G.Omarova.

Sonymen qatar, bank basshysynyń orynbasary «7-20-25» baǵdarlamasy tek paıdalanýǵa berilgen, bastapqy jańa úıge ǵana ıpotekalyq nesıe beretinin atap ótti.

«Qazirgi kezde jeke qurylys kompanııalary salǵan daıyn úıdiń sanyna qatysty qıyndyqtar bar. Onyń basty sebebi, qurylys kompanııalary úıdiń qurylysy 90 paıyzǵa oryndalǵan kezde, ıaǵnı, qurylysy tolyq aıaqtalmaı jatyp ony satyp jiberedi. Sol sebepti, biz de óz tarapymyzdan turǵyn úı qurylysyn jandandyrý maqsatynda atalmysh baǵdarlamaǵa tolyqtyrý engizildi. Osyǵan oraı, «Baspana» ıpotekalyq uıym ákimdikterge «7-20-25» baǵdarlamasy aıasynda turǵyn úı qurylysyna 150 mıllıard teńge bólýdi kózdep otyr. Bólingen qarjy revolverlik prıntsıppen 2 jyl saıyn qaıta aınalyp otyrady. Qazirgi kezde bul júıe boıynsha «Nurly jer» baǵdarlamasy sheńberinde ákimdikter jumys isteýde. Sondyqtan, qarjylandyrý mehanızmin júzege asyrýda qıyndyqtar bolmaýy tıis», - dep sózin túıindedi G.Omarova.