68 jastaǵy volonter: Erikti bolý úshin birinshi kezekte adal nıet kerek

ÓSKEMEN. QazAqparat – Jasy jetpisti alqymdaǵan Janna Jıbraevanyń volonterlikpen aınalysyp kele jatqanyna 30 jylǵa taıady. Muqtaj janǵa múmkindiginshe kómek kórsetý onyń ómirlik baǵdaryna aınaldy desek artyq aıtqandyq emes. Semeı qalasynda turatyn ájeı karantın kezinde de jerlesterine azyq-túlik taratyp, qolushyn sozýda, dep habarlaıdy QazAqparat.

«Januıa ortalyǵy» qoǵamdyq uıymynda 70-ke jýyq erikti bar. Olar bir jaǵadan bas, bir jeńnen qol shyǵaryp kópbalaly otbasylarǵa, az qamtylǵan januıalar men múgedekterge kómektesip keledi.

«Qıyn jaǵdaıǵa tap bolyp bizge habarlasqan ár adamnyń ótinishin jerde qaldyrmaımyz. Demeýshiler arqyly turǵyndardyń baspana máselesin de sheshýge tyrysamyz. Ózimizdiń zańgerlerimiz, psıhologtarymyz bar. Olar halyqqa baǵyt-baǵdar berip, jol silteıdi. Byltyrdan beri qaladaǵy «Tatýlastyrý ortalyǵymen» tyǵyz jumys isteýdemiz. Mundaǵy maqsatymyz – jas otbasylarǵa aqyl aıtyp, kıkiljińge túskenderdi keristirmeı, kelistirý», - deıdi qoǵamdyq uıymnyń dırektory Janna Jaǵyparqyzy.

Karantan kezinde olar muqtaj jandarǵa azyq-túlik taratýda. Sondaı-aq qashyqtan oqyp jatqan mektep oqýshylary úshin ekologııa taqyrybynda vebınar ótkizýde.

«Ózim 1991 jyldan volonterlikpen aınalysyp kelemin. Sol ýaqyttan beri talaı jumystar atqardyq. Osydan birneshe jyl buryn psıhonevrologııalyq ınternatqa monsha salyp bergenbiz. Áleýmettik máselelerge de aralasyp, jergilikti ákimdikpen tyǵyz baılanystamyz. Birde kúıeýi tastap ketken jalǵyzbasty áıel qońyraý shaldy. 4 balasyn asyraı almaı otyrǵanyn, aqshasy bolmaǵandyqtan páterden shyǵaryp jatqandyǵyn aıtyp, kómek surady. Sodan keıin tıisti organdarǵa habarlasyp, páter ıesine de mán-jaıdy túsindirdik. Aqshamen, azyq-túlikpen járdem kórsettik. Aıta bersek mundaı oqıǵalar óte kóp», - deıdi ShQO-daǵy eń qart volonter.

Eki balasynan 3 nemere súıgen Janna Jıbraeva jas eriktilerge únemi aqylyn aıtyp, tájirıbesimen bólisip otyrady.

«Volonter bolý úshin birinshi kezekte adal nıet kerek. Qoǵamǵa qandaı da bir paıdamdy tıgizsem degen maqsat bolǵan jón. Al bireýge ataq-abyroı, maqtan úshin kómektesý áste durys emes. Naǵyz erikti adamgershilikten attamaı, árkez júregin taza ustaıdy. Uly Abaı aıtpaqshy, «Adamzattyń bárin súı baýyrym dep», - deıdi Janna Jaǵyparqyzy.