68 balanyń ómirin qıǵan shárbat: Ózbekstanda qaýipti dárini satqandarǵa úkim shyqty

<p>TAShKENT. KAZINFORM&nbsp;&mdash; Tashkent qalalyq qylmystyq soty &laquo;Dok-1 Maks&raquo; preparaty tóńiregindegi is boıynsha aıyptalýshylarǵa úkim shyǵardy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Ózbekstan Joǵarǵy sotynyń málimetinshe, iske tóraǵalyq etýshi sýdıa Mýsa ıÝsýpov Farmatsevtıka salasyn damytý agenttiginiń burynǵy basshysy Sardor Karıevti kináli dep tanydy. Oǵan ÓR Qylmystyq kodeksiniń 186-3-baby 4-bóliginiń «a» jáne «b» tarmaqtary boıynsha (quramynda adam ólimine ákep soqqan kúshti áser etetin komponentteri bar dárilik zattardy bólshek saýdada ótkizý tártibin buzý) jáne 209-baptyń 2-bóliginiń «a» tarmaǵyna saı úkim shyǵaryldy.

Onyń 2 jyl 6 aı merzimge memlekettik organdarda basshylyq laýazymdarda jumys isteý quqyǵy shektelip, 18 jylǵa bas bostandyǵynan aıyryldy. Jaza merzimin esepteý 2023 jyldyń 24 qańtarynan (qamaýǵa alynǵan kún) bastalady.

Onyń orynbasarlary Amırhon Azımov pen Nodırbek Mýsaev 2 jyl 6 aı ishinde memlekettik organdarda basshylyq laýazymdarda jumys isteý quqyǵynan aıyrylyp, 16 jylǵa sottaldy.

Al Quramax Medikal JShQ dırektory bolǵan Úndistan azamaty Ragvendra Pratarǵa 20 jylǵa bas bostandyǵynan aıyrý jazasy kesildi.

Sot úkimine sáıkes, aıyptalýshylar atalǵan dárininiń saldarynan kóz jumǵan 68 bala men aýyr hálde jatqan 4 balanyń otbasyna 1 mlrd sým (35,9 mln teńge) ótemaqy tóleýi tıis.

Al densaýlyq jaǵdaıy ortasha dep baǵalanǵan jábirlenýshilerge 500 mln sým (17,9 mln teńge), saýyǵyp shyqqan 8 balaǵa 200 mln sýmnan (7,1 mln teńge) beriledi.

Eske salaıyq, 2022 jyly jeltoqsanda Ózbekstan Densaýlyq saqtaý mınıstrligi «Dok-1 Maks» preparatyn qabyldaǵan 18 balanyń kóz jumǵanyn rastaıtyn tekserý nátıjesin jarııalady.

Atap aıtqanda, Dárilik zattardy saraptaý jáne standarttaý memlekettik ortalyǵynyń qorytyndysyna sáıkes, «Dok-1 Maks» shárbaty belgilengen talaptarǵa saı bolmaı shyqqan. Keıin ony satýǵa ýaqytsha tyıym saldy.

Araǵa birneshe kún salyp, Ózbekstannyń Memlekettik qaýipsizdik qyzmeti (MQQ) balalardyń tumaýǵa qarsy úndi dárisinen keıin kóz jumý oqıǵasyna qatysty qylmystyq is qozǵady.

Qosa ketsek, QR Densaýlyq saqtaý mınıstrligi Ózbekstanda balalardyń ólimine sebep bolǵan «Dok-1 Maks» preparatynyń elimizde satylmaıtynyn málim etken bolatyn.