665,5 mlrd teńge: Nur-Sultan qalasynyń 2022 jylǵa naqtylanǵan bıýdjeti belgili boldy
Bul týraly qalanyń ekonomıka jáne bıýdjettik josparlaý basqarmasynyń basshysy Qaısar Mańqaraev qoǵamdyq keńes ókilderiniń aldynda aıtty.
«Aktıvter jáne memlekettik satyp alý basqarmasyna kommýnaldyq menshikke kólik satyp alýǵa, Táýelsizdik, Beıbitshilik jáne kelisim saraılaryn aǵymdyq jóndeýge, jabdyqtar satyp alýǵa qosymsha 4 mlrd 120 mln teńge kózdelip otyr.
Qarjy basqarmasyna jergilikti atqarýshy organnyń rezervine 8 mlrd 626 mln teńge jáne paıdalanylmaǵan nysanaly transfertterdi qaıtarý kózdeledi», - degen basqarma basshysy qalalyq máslıhattyń jyldyq shyǵynyna da qosymsha qarajat bólý kerektigin aıtty.
«Máslıhat apparatyna eńbekaqy tóleý qorynan normatıvtik-quqyqtyq aktilerdi jarııalaýǵa jáne kúrdeli shyǵystarǵa qosymsha 59,4 mln teńge qarastyryldy.
Investıtsııalar jáne kásipkerlikti damytý basqarmasyna bıznestiń «Bıznestiń jol kartasy» sheńberindegi jobalardy sýbsıdııalaýǵa qosymsha 2 mlrd teńge qarastyryldy.
Tsıfrlandyrý jáne memlekettik qyzmetter basqarmasyna derekteri «bultty» platformada saqtalatyn qoǵamdyq oryndardy beınebaqylaý júıesin jalǵa alýǵa jáne qyzmet kórsetýge qosymsha 537 mln teńge kózdeledi», - dedi Qaısar Mańqaraev.
Osylaısha engiziletin ógeristerdi eskere otyryp, Nur-Sultan qalasynyń 2022 jylǵy naqtylanǵan bıýdjetiniń jalpy kólemi 665 mlrd 508 mln teńge bolyp otyr.
«Onyń ishinde menshik túsimder 430 mlrd 726 mln teńge, respýblıkalyq transfert túsimi 108 mlrd 889 mln teńge, qaryzdardyń túsimi 32 mlrd 167 mln teńge jáne bos qaldyqtar 55 mlrd 724 mln teńge», - dedi ol.
Aıta keteıik, atalǵan bıýdjet jobasy áli bekitilgen joq. Qoǵamdyq keńestiń quzyryna qala bıýdjetin bekitý ókileti berilmegen. Keńes músheleriniń usynystary men eskertýleri tek konsýltatsııalyq mańyzǵa ǵana ıe.