6,6 jylǵa sottalǵan akter Asqar Jumabek qalaı bir jylda bostandyqqa shyqty

<p>ASTANA. KAZINFORM &mdash; Byltyr otandyq ártis Asqar Jumabek pen karaoke-bar qyzmetkerleri arasynda janjal shyǵyp, sońy tóbeleske ulasqan. Saldarynan bes jábirlenýshiniń ekeýine aýyr jáne ortasha deńgeıde densaýlyǵyna zııan kelgen.&nbsp;</p>

Eske sala ketsek, byltyr qazanda qazaqstandyq tanymal akter Asqar Jumabek 6,6 jylǵa sottalǵan edi.

Akterge buzaqylyq pıǵylda bir top adamnyń densaýlyǵyna qasaqana aýyr jáne ortasha zııan keltirdi degen aıyp taǵyldy.

Degenmen kesheli-beri BAQ betterinde jáne áleýmettik jelide Asqar Jumabek bostandyqqa shyqty degen aqparat tarap jatyr. Osy oraıda istiń mán-jaıyn sottan suraǵan edik. 

Sottalǵan akter Taraz qalasynyń № 2 sotyna jazanyń ótelmegen bóligin neǵurlym jeńil jaza túrine, ıaǵnı aıyppulǵa aýystyrý týraly ótinish jazǵan. 

Osylaısha Qazaqstan Respýblıkasy Joǵarǵy sotynyń qylmystyq ister jónindegi sot alqasynyń 20.08.2024 jylǵy qaýlysymen 11.10.2023 jylǵy úkim ózgertilip, túpkilikti bas bostandyǵynan aıyrý jazasynyń merzimi 4 jyl 15 kúnge deıin tómendetilgen. 

— Sottalǵan Asqar Jumabek shyn júrekten ókinish bildirip, túzelý jolyna túskenin kórsetip, ótinishhatyn tolyq qoldap, qanaǵattandyrýdy surady. Jábirlenýshilerdiń ókili — advokaty A. jábirlenýshilerge materıaldyq jáne moraldyq zalaldy tolyq ótelgenin, olar sottalǵan azamatty keshirgenderin, qoıar talaptary joq ekenin aıtyp, ótinishhatty qanaǵattandyrýǵa qarsylyqtary joq ekenin málimdedi, — delingen sottyń habarlamasynda. 

Óz kezeginde ártis qamaýda otyrǵan № 25 mekemeniń ókili sottalýshynyń ótinishhatyn qanaǵattandyrýǵa laıyq dep tanydy. Sonymen qatar, prokýror sottalǵannyń ótinishhatyn qanaǵattandyrý qajet degen qorytyndy bergen.

— Sot Asqar Jumabektiń zalaldy ótegenin jáne jábirlenýshilerdiń ótemaqy qoryna májbúrli tólemdi jáne protsestik shyǵyndy tólegenin, sonymen qatar jábirlenýshilerdiń ony keshirgenin eskerip, ótinishhatyn qanaǵattandyryp, ótelmegen jaza merzimin, ıaǵnı 2 jyl 5 aı 11 kúndi 670 797 teńge mólsherdegi aıyppulǵa aýystyrdy. Taraptar qaýlyǵa shaǵym túsirgen joq, — degen sheshim shyǵarǵan sot. 

Sot sheshimi zańdy kúshine endi.

Buǵan deıin habarlaǵanymyzdaı, Almatyda tanymal ánshi qamaýǵa alyndy.