65 myńnan astam almatylyqqa bank qyzmetterin paıdalanýǵa shekteý qoıylýy múmkin

ALMATY. QazAqparat – 1 qazan kúni 2021 jylǵa arnalǵan jeke múlik salyǵyn tóleý merzimi aıaqtalady. 65 myńnan astam almatylyq óz mindettemelerin áli oryndaǵan joq. Bul týraly Óńirlik kommýnıkatsııalar qyzmetiniń brıfınginde Almaty qalasy memlekettik kirister departamenti óndiristik emes tólemder basqarmasynyń basshysy Qýanysh Túmenbaev málim etti, dep habarlaıdy QazAqparat tilshisi.

Spıkerdiń sózinshe, 1 qazan kúni jyljymaıtyn múlik jáne jer ýchaskeleri menshik ıeleriniń 2021 jylǵa eseptelgen múlik salyǵyn tóleý merzimi aıaqtalady. Oǵan sanaýly kún qalsa da, 65 215 menshik ıesi salyq mindettemesin áli oryndamaǵan.

«23 qyrkúıektegi jaǵdaı boıynsha 505 myń adamnyń 440 myńy 2021 jylǵa jalpy somasy 2,9 mlrd teńge múlik salyǵyn tóledi. 65 myńnan astam turǵyn jalpy somasy 945 mln teńge salyqty áli tólegen joq», - dedi Qýanysh Túmenbaev.

Sonymen qatar, ol boryshkerlerge qandaı shara qoldanylatynyn aıtty.

«Salyq tóleý merzimi ótkennen keıin, múlik salyǵyn tólemegender banktik qyzmetterdi ala almaıdy, onyń ishinde banktik shot ashý, aýdarymdar jasaý, nesıe alý jáne taǵy basqa. Bul Salyq kodeksinde qarastyrylǵan. Árbir keshiktirilgen kún úshin Ulttyq bank belgilegen resmı qaıta qarjylandyrý stavkasynyń 1,25 eselengen mólsherinde aıyppul salynady»,- dedi spıker.