600 myń múshesi bar kásipodaq uıymy referendýmǵa belsendi qatysady – kásipodaq basshysy

NUR-SULTAN. QazAqparat – Qazaqstandaǵy salalyq bilim jáne ǵylym qyzmetkerleriniń kásipodaǵy referendým aldyndaǵy túsindirý jumystaryn qorytyndylap jatyr, dep habarlaıdy QazAqparat tilshisi.

Quramynda 600 myńǵa jýyq múshesi bar kásipodaq uıymy referendýmǵa baılanysty túsindirme jumystaryn qorytyndylap jatyr. Bul týraly uıymnyń tóraǵasy Aıgúl Muqasheva aıtty.

«Memleket basshysy Qasym-Jomart Kemeluly Toqaevtyń Jarlyǵymen 5 maýsym kúni Ata Zańymyzǵa ózgerister men tolyqtyrýlar engizý boıynsha respýblıkalyq referendým ótkiziledi. Memleket Basshysynyń Jańa Qazaqstandy qurý ıdeıasynyń Referendým ótkizýden bastaý alýy tarıhı oqıǵa, mańyzdy sát. Qazaqstan Respýblıkasy Kásipodaqtar federatsııasy quramyndaǵy eń iri salalyq uıym – Qazaqstandyq salalyq bilim jáne ǵylym qyzmetkerleri kásipodaǵy Prezıdent bastamasyn jan-jaqty qoldaıdy. Júz jylǵa jýyq damý tarıhy bar bizdiń uıym azamattyq qoǵamnyń ajyramas bóligi retinde elimizdiń mańyzdy qoǵamdyq-saıası oqıǵalaryna belsendi qatysady», - deıdi kásipodaq basshysy.

Aıtýynsha, búkil óńirlerde kásipodaq músheleri arasynda referendýmnyń maqsaty men mindetin túsindirý jumystary júrgizilgen.

«Ata zańymyzǵa usynylyp otyrǵan ózgerister halyqtyń kóp jylǵy talap-tilekterinen týyndaıtyn tarıhı sheshimder ekeni anyq.

Bul reformalar memleketti basqarý isinde keń múmkindikterge, turmysymyzdy jaqsartýǵa, ózimizdiń ómirimizdi jańartýǵa jol ashady. Bolashaǵymyzdy jańa betburysqa bastaıtyn mańyzdy sharaǵa sanaýly kún ǵana qaldy. El múddesi úshin aıryqsha sheshimder qabyldanatyn kezeńge beı-jaı qaramaı, barsha qazaqstandyqtar referendýmǵa belsendi qatysady dep senemin», - deıdi Aıgúl Muqasheva.

Aıta keteıik, búgin Prezıdent referendýmǵa oraı beıneúndeý joldaıdy.