6 transulttyq uıymdasqan qylmystyq toptyń kózi joıyldy - QR ІІM

<p>Memleket basshysynyń Іshki ister mınıstrliginiń aldyna qoıǵan mindetterin oryndaý maqsatynda uıymdasqan qylmysqa qarsy kúres baǵytynda birqatar is-shara júzege asyryldy. Nátıjesinde uıymdasqan qylmystyq toptardy qurý, olarǵa basshylyq etý jáne olardy qarjylandyrý boıynsha 60-tan astam qylmystyq is tirkeldi. Onyń ishinde transulttyq aýqymdaǵy faktiler de bar. Qylmystyq qurylymdardyń 250-den astam qatysýshysy qylmystyq jaýapkershilikke tartyldy, &ndash; dep habarlaıdy <a href="https://polisia.kz/zhyl-qorytyndysy-ujymdasqan-qylmysqa-qarsy-kures-departamenti-6-transulttyq-uqt-ny-zhojdy/" target="_blank" rel="noopener">Polisia.kz saıty.</a></p>

– El aýmaǵynda sheteldik krımınalıtettiń yqpalyna jol bermeý boıynsha sharalar qabyldanyp jatyr. Júrgizilip jatqan jumystyń nátıjesinde quramyna Qazaqstan azamattary da, jaqyn shet memleketterdiń azamattary da kiretin alty transulttyq uıymdasqan qylmystyq toptyń kózi joıyldy. Atalǵan faktiler boıynsha transulttyq qylmystyq topty uıymdastyrǵany jáne oǵan qatysqany úshin toǵyz qylmystyq is tirkeldi. Sonymen qatar sheteldik áriptestermen ózara is-qımyl barysynda respýblıka aýmaǵyna tórt sheteldik qylmystyq bılik ókiliniń kirý faktilerin der kezinde anyqtap, jolyn kestik, – dep atap ótti QR ІІM uıymdasqan qylmysqa qarsy kúres departamentiniń bastyǵy Qanat Nurmaǵambetov.

Uıymdasqan qylmysqa qarsy kúres basqarmalarynyń qyzmetkerleri jyl basynan beri zańsyz aınalymnan 470 atys jáne travmatıkalyq qarý, 44 granata, eki granata atqysh, 400 gramm trotıl jáne 14 myńnan astam oq-dári tárkiledi.

Prezıdenttiń tapsyrmalaryn oryndaý sheńberinde memlekettik organdarmen, halyqaralyq jáne úkimettik emes uıymdarmen ózara is-qımyl jasaı otyryp, “Qazaqstan Respýblıkasynda adam saýdasyna qarsy is-qımyl týraly” Zań jobasy ázirlendi. Ol adam saýdasynyń aldyn alý jáne oǵan qarsy kúresti, sondaı-aq sýbektilerdiń qyzmetin úılestirý jónindegi uıymdyq-quqyqtyq negizderdi reglamentteıdi, ýákiletti organdardy aıqyndaıdy jáne adam saýdasynyń qurbandaryn qorǵaý boıynsha sharalardy belgileıdi. Qazirgi ýaqytta zań jobasy Parlament Májilisiniń qaraýynda.

– Polıtsııa qabyldaǵan sharalardyń nátıjesinde bıyl adam saýdasyna baılanysty 150-den astam qylmystyq is tirkeldi, onyń ishinde 28 fakt kámeletke tolmaǵandarǵa qatysty. Máselen, qazan aıynda “Qorǵas” halyqaralyq ortalyǵynyń aýmaǵynda saýyqtyrý ortalyǵy men qonaq úı kesheniniń atyn jamylyp jumys istegen prıtondar men jasyryn kazınolardyń zańsyz qyzmeti toqtatyldy. Bes kúdikti quryqtaldy, onyń ishinde ekeýi shetel azamaty, – dedi Qanat Nurmaǵambetov.

Óńirlerde, ásirese oqý oryndarynda bopsalaý derekterin boldyrmaýǵa baǵyttalǵan jumystar qarqyndy túrde júrgizilip keledi. Uıymdasqan qylmysqa qarsy kúres basqarmalarynyń qyzmetkerleri bopsalaýdyń 470 faktisin anyqtap, jolyn kesti, onyń ishinde 261 qylmystyq is boıynsha kináli adamdar jaýapqa tartyldy. Budan basqa paıdaly qazbalar men baǵaly metaldardy óndirý obektilerinde urlyqqa jol bermeý boıynsha sharalar qabyldanyp jatyr.

– Aımaqtarda jekelegen qylmystyq toptardy anyqtaý jáne olardyń áreketiniń jolyn kesý boıynsha jedel-izdestirý is-sharalary turaqty negizde júrgiziledi. Bıyl tek Qaraǵandy oblysynyń ózinde yqpal etý salalaryn ózara bóliske salyp qana qoımaı, óńirdiń iri kásiporyndarynan taýarlyq-materıaldyq qundylyqtardy urlaǵan qarsylas eki uıymdasqan qylmystyq topqa tosqaýyl qoıyldy. Naýryz jáne tamyz aılarynda ótkizilgen eki aýqymdy arnaıy operatsııaǵa 500-den astam polıtsııa qyzmetkeri men Ulttyq ulannyń arnaıy kúshteriniń jaýyngerleri jumyldyryldy. Eki toptyń 70-ke jýyq qatysýshysy ustalyp, onyń ishinde 30 adam qamaýǵa alyndy. 170-ten astam tintý sharalary júrgizildi, nátıjesinde 18 atys jáne travmatıkalyq qarý, sýyq qarý, úlken kólemde qarajat, jarylǵysh zattar jáne basqa da zattaı aıǵaqtar tárkilendi. Uıymdasqan qylmystyq top qurǵany, basqarǵany jáne oǵan qatysqany úshin, sondaı-aq qarý saqtaý, urlyq, buzaqylyq, bopsalaý, densaýlyqqa aýyr zııan keltirý jáne kisi óltirýge oqtalý faktileri boıynsha birneshe qylmystyq ister tirkeldi, – dedi spıker.

Elordada tapsyryspen kisi óltirýdiń eki deregi anyqtalyp, der kezinde toqtatyldy. Qaryzdy qaıtarmaý qylmystarǵa sebep bolǵan.

– Biz basqa quqyq qorǵaý jáne arnaıy organdarmen tyǵyz baılanystamyz. Máselen, qańtar jáne qazan aılarynda Ulttyq qaýipsizdik komıtetimen birlesip, Qyzylorda, Jambyl, Túrkistan jáne Jetisý oblystarynda buzaqylyqqa, urlyqqa, bopsalaýǵa, qarýdy zańsyz saqtaýǵa, zańsyz kóshi-qondy uıymdastyrýǵa, adamdardy urlaýǵa jáne qarýdy qoldana otyryp jasalǵan qylmystyq qaqtyǵystarǵa qatysy bar qylmystyq toptardy ustaý boıynsha arnaıy operatsııalar júrgizildi. Sondaı-aq Qarjy monıtorıngi agenttigimen de birlesken jumystar júrgizilýde. Mysaly, aǵymdaǵy jyldyń aqpan aıynda birlesken jedel is-sharalardy ótkizý kezinde zańsyz aınalymnan 20 myń lıtrden astam kontrafaktili alkogol, 16 myń lıtrden astam alkogol jáne 1 600 000 qorap temeki tárkilendi. Odan bólek birlesken is-sharalar barysynda jeltoqsan aıynda Pavlodar jáne Abaı oblystarynyń aýmaǵynda jalpy quny 1,5 mlrd teńge nemese 3 mln AQSh dollaryn quraıtyn aktsızsiz temeki ónimderin tasymaldaǵan úsh júk kóligi anyqtalyp, toqtatyldy. Mundaı jedel is-sharalar Qazaqstan Respýblıkasynyń zańnamasyna sáıkes prokýratýranyń úılestirýimen júrgiziledi, – dep atap ótti departament bastyǵy.

Uıymdasqan qylmysqa qarsy kúres bólinisteriniń jedel ázirlemeleriniń orbıtasynda bıoresýrstardy zańsyz óndirýmen aınalysatyn qylmystyq toptar da bar. Qyrkúıek aıynda Soltústik Qazaqstan oblysynyń aýmaǵynda shaıandardy zańsyz aýlaǵan adamdar toby áshkerelendi. 15 tonnadan astam shaıan tárkilendi.

Aldyn ala boljam boıynsha memleketke 200 mln teńge zalal keltirildi. Qazan aıynda Batys Qazaqstan oblysynda bekire tuqymdas balyqtar men ýyldyryqtardy zańsyz ótkizý arnasy anyqtaldy.

Ustalǵan top balyq ónimderin jalǵan qujattar arqyly bazarlarǵa jetkizip otyrǵan. Tintý kezinde 1,5 tonnadan astam bekire balyǵy, shamamen 30 kg ýyldyryq, aqsha jáne atys qarýy tárkilendi.

Uıymdasqan qylmysqa qarsy kúres boıynsha jumys ІІM basshylyǵynyń baqylaýynda.