6 sáýir. Jylnama
ATAÝLY KÚNDER
Dúnıejúzilik ústel tennısi kúni
Alǵash ret 2015 jyly atalyp ótti. Jańa sporttyq datanyń bekitilýine Halyqaralyq ústel tennısi federatsııasy (International Table Tennis Federation, ITTF) muryndyq boldy. Maqsat – osy sport túrin keńinen tanytý, ony ártúrli elderde damytý, tennıspen aınalysatyn adamdardy biriktirý jáne salaýatty ómir saltyn nasıhattaý.
Beıbitshilik pen damý úshin halyqaralyq sport kúni
2013 jyly 23 tamyzda BUU Bas Assambleıasy bekitken. Kez kelgen elde sporttyń alýan túrin nasıhattaıtyn sporttyq qoǵamdastyqtar bar. Sportpen shyǵý tegi men áleýmettik jaǵdaıyna qaramastan árbir adam shuǵyldana alady. Al sporttyq sharalardyń alýandyǵy jáne erekshe sıpaty beıbitshilikti damytyp, nyǵaıta túsetin mańyzdy faktorǵa aınaldy.
ESTE QALAR OQIǴALAR
1992 jyly Kazaqstan Respýblıkasy men Kanada, Kazaqstan Respýblıkasy men Palestına memleketi arasynda dıplomatııalyq qatynastardy ornatý týraly notalar almasty.
1993 jyly Qazaqstan Respýblıkasynyń Prezıdenti Nursultan Nazarbaev pen «Shevron» (AQSh) munaı korporatsııasynyń basqarma tóraǵasy Kennet Derr «Teńizshevroıl» birlesken kásipornyn qurý týraly kelisimge qol qoıdy. «Teńizshevroıl» - Qazaqstandaǵy munaı jáne gaz óndiretin eń iri kompanııa.
1995 jyly Qaraǵandy qalasynda ǵalym Ebineı Bóketov turǵan úıge eskertkish taqta ornatyldy.
1999 jyly Almaty oblysy Kóksý aýdanynyń Balpyq bı kentinde batyr, sheshen, Balpyq bıge eskertkish ornatyldy.
2012 jyly Tampa qalasynda (AQSh, Florıda shtaty) ótken «Gasparılla» halyqaralyq kınofestıvalinde tanymal gollıvýd akteri, rejısser Arman Assanteniń Qazaqstan týraly «Dala dıalogy» fılmi úzdik qysqametrajdy derekti fılm retinde júldege ıe boldy. Qazaqstan jaıly 27 mınýttyq fılm ózin prodıýser, stsenarıst jáne rejısser retinde synap kórgisi kelgen sheteldik tanymal akterdiń kózqarasymen túsirildi. Qazaqstan týraly fılm – onyń alǵashqy jumystarynyń biri.
2014 jyly Ulybrıtanııada Qazaq ádebıetiniń aptalyǵy ótti. Іs-sharany Kazakh Arts Academy uıymdastyryp, Birikken Koroldiktegi Qazaqstan Respýblıkasynyń elshiligi qoldaý bildirgen. Іs-sharada belgili qazaq dramatýrgi Dýlat Isabekovtiń týyndysy alǵash ret aǵylshyn tilinde usynyldy.
2015 jyly «Nurly jol» jańa ekonomıkalyq beldeýi aıasynda Kaspııde Quryq portynda parom kesheniniń qurylysy bastaldy.
2017 jyly jambyldyq ǵalymdar Vladımır Kım jáne Muqataı Nemerebaev Frankfýrttaǵy (Germanııa) 2016 jylǵy Halyqaralyq kitap jármeńkesiniń altyn medal ıegeri atandy.
2017 jyly Batys Saharada (MINURSO) beıbitshilik pen qaýipsizdikti qoldaý jónindegi BUU mıssııasyna qatysyp jatqan Qazaqstan Qarýly Kúshteriniń ofıtseri podpolkovnık Danııar Ismaılov kúshter qolbasshysynyń ókimimen shtabtyń oqý bólimi bastyǵy laýazymyna taǵaıyndaldy. Jańa laýazymda Danııar Ismaılov oqytý standarttaryna, ózderine júktelgen tapsyrmalardy tıimdi oryndaý úshin barlyq áskerı baqylaýshylardyń daıyndyǵy men ázirligine jaýap beredi. Odan basqa, qazaqstandyq ofıtser BUU-nyń mıssııasyna qatysý úshin kelgen áskerı jáne azamattyq personaldan aǵylshyn tilinen emtıhan qabyldaıdy jáne oǵan jetekshilik etedi.
2018 jyly Túrkııada túrki álemine ortaq tarıhty qamtıtyn oqýlyq mektep baǵdarlamasyna tańdaý páni retinde engizildi. Qazaqstanda shyǵarylǵan oqýlyqty Halyqaralyq Túrki akademııasy (TWESCO) ázirlep shyǵarǵan. Osy oqýlyqpen Qazaqstanda Nazarbaev zııatkerlik mektebiniń oqýshylary da oqıdy.
2019 jyly «Lıtvadaǵy Qazaqstan kóktemi» festıvaliniń saltanatty ashylýynda ataqty qazaqstandyq rejısser Aqan Sataevtyń «Anaǵa aparar jol» fılmi kórsetildi.
2020 jyly Túrkııanyń «Anadoly» aqparat agenttigine 100 jyl toldy. 1920 jyly 31 Naýryzda Geıv qalasynyń temirjol stantsııasynda Mustafa Kemal Atatúrikpen kezdesýge qatysqan jýrnalıster ıÝnýs Nadı men Halıde Edıb Ulttyq aqparattyq agenttik qurý ıdeıasyn aıtty. Agenttiktiń ataýy «Túrik», «Ankara», «Anadoly» dep usynylǵan úsh ataýdyń ishinen tańdap alyndy. 6 sáýirde agenttiktiń resmı ashylýy ótti. Agenttiktiń jańalyqtary túrik, alban, aǵylshyn, arab, bosnııa, kúrd, makedon, parsy, orys jáne frantsýz tilderinde shyǵady. «QazAqparat» Halyqaralyq aqparat agenttigi men «Anadoly» agenttigi arasynda ózara yntymaqtastyq týraly kelisimge Ystanbulda 2018 jyldyń 10 sáýirinde qol qoıylǵan edi.
2021 jyly Qaraǵandy oblysy Shet aýdany Moıynty aýylynda Tańybaı Beknazarulynyń eskertkishi ashyldy. Tanybaı Beknazaruly (1670-1755) - Orta júzdiń Arǵyn rýynan shyqqan, qazaq halqynyń táýelsizdigi úshin kúresken batyr. Jońǵarlarǵa qarsy shaıqastardyń birinde jaýdyń bas batyry Qapaldy jeńip shyǵady.
2022 jyly Bıbisara Asaýbaeva áıelder arasynda blıts boıynsha álem chempıony atanǵan eń jas shahmatshy áıel retinde Gınnestiń rekordtar kitabyna endi. 2021 jyly Polshada ótken shahmattan álem chempıonatynda jeńiske jetkeni úshin Gınnestiń dúnıejúzilik rekordtar uıymy Bıbisara Asaýbaevaǵa sertıfıkat tabys etti.
2022 jyly Qazaqstan taekvondo sportynan tarıhı jetistikke qol jetkizdi. Qazaqstandyq taekvondoshy – Qorǵanys mınıstrliginiń ortalyq sport klýbynyń sportshysy Jansel Denız jańartylǵan álemdik reıtıngte birinshi orynǵa kóterildi.