6 myńnan astam shetel mıgrantyna astanada jumys isteýge ruqsat berildi

NUR-SULTAN. QazAqparat – Bıyl Nur-Sultan qalasy aýmaǵynda jumys isteýge 6 myń 117 shetel azamatyna ruqsat berildi. Atalǵan rásim halyqqa qyzmet kórsetý ortalyǵy arqyly júzege asyrylady, dep habarlaıdy QazAqparat tilshisi.

«Eger shetel azamaty Qazaqstanda bolý tártibin 10 kúnnen artyq buzsa, ákimshilik hattama toltyrylyp is sotqa jiberiledi. Sottyń sheshimine sáıkes ol azamatqa 25 AEK kóleminde aıyppul salynady nemese elden shyǵarylady. Sondaı-aq, Qazaqstanǵa 30 kúnnen artyq ýaqytqa kelgen shetel azamattaryna ýaqytsha turý múmkindigi rásimdeledi. Olar jumyspen, oqýmen, kásip etip taǵy sol sııaqty maqsatpen kelýi múmkin. Jyl basynan beri elordada 9 myńnan astam ótinim rásimdelip, ruqsat berildi», - dedi Nur-Sultan qalasy polıtsııa departamenti kóshi-qon qyzmeti basqarmasynyń basshysy Arman Baımuhamet atalǵan mekemede ótken brıfıngte.

Sondaı-aq, polıtsııa departamentiniń ókili elordaǵa jumys izdep keletin shetel azamattaryna qulaqqaǵys jasady.

«Nur-Sultan qalasyna kelip jumys istegisi keletin shetel azamattary barlyq suraq boıynsha halyqqa qyzmet kórsetý ortalyǵyna júgine alady. Ol jerde saqtandyrý polısin rásimdeý, saýsaq izin alý jáne basqa jeke derekter tirkeledi. Jyl basynan beri halyqqa qyzmet kórsetý ortalyǵy arqyly 6 myń 117 shetel azamatyna eńbek etýge ruqsat berildi. Odan bólek, syrttan keletin eńbek magranttarynyń turǵylyqty jeri de esepke alynady», - deıdi ol.

Spıker usynǵan statıstıkaǵa sáıkes 2022 jyldyń 3 aıynda 56 myń shetel azamaty elordada turǵylyqty jerin rásimdegen.

Sonymen qatar 24 myń sheteldik turǵylyqty jerin aýystyrǵan.