6 myńnan astam reseılik Qazaqstanǵa jumys isteýge kelgen
«Bizdiń mınıstrlik Іshki ister mınıstrligimen birlesip, kún saıyn sonyń ishinde UQK Shekara qyzmeti arqyly Qazaqstanǵa kelgenderdi jáne ketetinderdi ár el boıynsha, ár baǵyt boıynsha qadaǵalaıdy. Eger Reseı boıynsha naqty aıtatyn bolsaq, onda 30 naýryz kúngi tańerteńgi jaǵdaı boıynsha Qazaqstanda 101 myńnan astam reseılik bar. Onyń ishinde 6350 adam jyl basynan beri jumys isteý úshin kelgen», - dedi Erjan Birjanov Ortalyq kommýnıkatsııalar qyzmetinde tilshilerdiń saýalyna bergen jaýabynda.
Onyń aıtýynsha, bul sandar reseılikterdiń Qazaqstanǵa aǵylyp kelip jatqanyn bildirmeıdi. Máselen, ótken jyly Qazaqstanǵa kelgen RF azamattary 18,8 myń adam bolǵan.
«Qorqynysh kóp, bizdegi jumys oryndaryn sheteldikterdiń ıemdenetini týraly kóp aıtylady. Biraq tájirıbe kórsetkendeı, onyń jaǵymdy jaqtary da bar. QR tsıfrlyq damý, ınnovatsııalar jáne aeroǵarysh ónerkásibi mınıstrliginiń bastamasymen elimizge joǵary bilikti mamandar, aýqymdy IT-kompanııalar kelip jatyr. Máselen, inDriver Qazaqstanǵa keldi, keńsesin ashady. Bul bilimniń, biliktiliktiń ımporty. Odan nege qorqamyz? Qazaqstandyqtar úshin semınarlar aıasynda aýqymdy qarajatqa koýchter shaqyrylady. Qazir mundaı iri kompanııalar bizge kelip, qazaqstandyqtardy jumys isteýge úıretse nemese osy jerde kásiporyndar ashsa, bul qosymsha jumys oryndary jáne bıýdjetke tólenetin qosymsha salyq bolady», - dedi E. Birjanov.