6 qańtar. Jylnama
ESTE QALAR OQIǴALAR
1938 jyly Aqmoladaǵy lagerge (ALJIR) tutqyndardyń (áıelder) alǵashqy legi ákelindi. Olardyń qolynda 1 jastan 3 jasqa deıingi balalary da boldy. Lager qazirgi Astana qalasynyń ońtústik-batysynda, Tóńkeris (burynǵy aty - Malınovka) eldi mekeninde quryldy.Ekinshi dúnıejúzilik soǵys jyldarynda lagerde 8 myńǵa jýyq áıel tutqynda boldy. 1950 jyldyń basynda ALJIR taratylyp, 1953 jyly tolyqtaı jabyldy.
1971 jyly Almatyda Qazaqstandaǵy alǵashqy Ǵylymı-tehnıkalyq aqparat ortalyǵy quryldy.
2009 jyly «Qazaq medıtsınalyq akademııasy» AQ «Astana medıtsınalyq ýnıversıteti» AQ bolyp qaıta qurylyp, «Ulttyq medıtsınalyq holdıng» AQ quramyna kirdi.
2010 jyly «Qazposhta» aktsıonerlik qoǵamy Qazaqstan Respýblıkasynyń Eýropadaǵy qaýipsizdik jáne yntymaqtastyq uıymyna tóraǵalyǵyna arnalǵan kórkem sýretti poshta markasyn aınalymǵa shyǵardy. Tórt boıaýly ofsettik baspa ádisimen oryndalǵan markanyń nomınaly 230 teńge, taralymy 30 myń dana, sýretshisi - Danııar Muhamedjanov.
2012 jyly Qyzylorda oblystyq Mádenıet basqarmasy «Qaıtalanbas daýystar» dıskiler jınaǵyn shyǵardy. 28 dıskten quralǵan bul jınaqqa óńirden shyqqan 225 tanymal óner jáne ádebıet qaıratkeri, ártister men ǵalymdardyń ánderi men kúıleri, sondaı-aq ádebı shyǵarmalary endi. Solardyń ishinde Mustafa Shoqaı, Ábdildá Tájibaev, Muhamedjan Qarataev, Asqar Toqmaǵambetov, Áýelbek Qońyratbaev, Zeınolla Shúkirov, Ábdijámil Nurpeıisov, Qaltaı Muhamedjanov sekildi tanymal tulǵalar bar.
2012 jyly Ekibastuzda Qazaqstannyń globýsy jasaldy. Músinshi Ǵamal Saǵıdenov osy týyndysyn Beıbitshilik jáne Kelisim monýmenti dep atady. Qazaqstannyń geografııalyq keskini globýstyń ón boıyn túgel alyp jatyr ári onda beıbitshiliktiń sımvoly sanalatyn kógershinder keskindelgen.
2014 jyly Eýropa bıznes assambleıasy «Astanagorarhıtektýra» JShS-ne arhıtektýra men qurylys salasynda jetken jetistikteri men sapasy úshin «Best Enterprise» («Úzdik mekeme») bedeldi marapatyn tapsyrdy.
2016 jyly dúnıejúzine tanymal qazaqstandyq bylǵary qolǵap sheberi Gennadıı Golovkındi belgili amerıkalyq boxing.com saıty 2015 jyldyń úzdik boksshysy dep jarııalady.
2017 jyly Sırııa Arab Respýblıkasynyń Jerorta teńizi jaǵalaýynda ornalasqan Tartýs portyna Qazaqstannan gýmanıtarlyq kómek jetkizildi. Júkti tapsyrý sharasyna Qazaqstan Respýblıkasynyń Iordanııadaǵy elshisi Azamat Berdibaı qatysty. 33 konteınerge salynǵan 500 tonna júktiń ishinde azyq-túlik pen dári-dármek boldy.
2019 jyly Almaty oblysy Talǵar aýdanynda jyl boıy jumys isteıtin sporttyq-otbasylyq tıptegi «Oıqaraǵaı Lesnaıa skazka» taý-shaӊǵy kesheni ashyldy. Jaz mezgilinde shaӊǵy joldary velosıped tebýge laıyqtalady.Taý-shaӊǵy kesheniniӊ jalpy aýmaǵy - 85 ga. Teӊiz deӊgeıinen 1500-1800 metr bıiktikte ornalasqan. Aldaǵy jyldarda syrǵanaýǵa arnalǵan 13 kılometr joldy 40 kılomerge jetkizý josparlanǵan.
2020 jyly Qazaqstan men AQSh eki el arasyndaǵy tikeleı turaqty reısterdi oryndaý úshin quqyqtyq bazany qalyptastyrýshy áýe qatynasy týraly kelisimge qol qoıdy. Osy kelisim Halyqaralyq azamattyq avıatsııa uıymynyń (ICAO) áýe kóligin odan ári lıberalızatsııalaý jónindegi usynymdaryna sáıkes «ashyq aspan» qaǵıdattaryn kózdeıtin Qazaqstan Respýblıkasy úshin alǵashqy qujat boldy.