6 aıda asa aýyr sybaılas jemqorlyq qylmystar 3 esege ósti
«2020 jyldyń 6 aıynyń qorytyndysy boıynsha tirkelgen asa aýyr sybaılas jemqorlyq qylmystardyń sany 2019 jyldyń sáıkes kezeńimen salystyrǵanda 3 esege ósti. Aýyr sybaılas jemqorlyq qylmystary boıynsha ósim 10 paıyzdy qurady. Júıeli sybaılas jemqorlyq faktileriniń jolyn kesý 22 paıyzǵa artty», - dedi Nurlan Jaqsymbetov.
Onyń atap ótýinshe, sybaılas jemqorlyqqa qarsy qyzmet nátıjeliliginiń basty talaptarynyń biri - qylmystyq áreket saldarynan memleketke kelgen shyǵyndy óteý. Bul rette osy jyldyń 6 aıynda agenttik qazynaǵa 33,2 mlrd teńgeni ótedi. Ótken jyldyń sáıkes kórsetkishimen salystyrǵanda bul soma eki esege artyq. Sońǵy 2,5 jylda 74,6 mlrd teńge nemese anyqtalǵan zalaldyń 91 paıyzy ótelgen. Mysal úshin, bul qarajatqa 37 mektep nemese 70 balabaqsha salýǵa bolady. Memleketke keltirilgen zalaldy anyqtaý, onyń jolyn kesý jáne óteý jónindegi barlyq aýqymdy jumysty agenttiktiń nebári 660 jedel qyzmetkeri men tergeýshisi júzege asyrady.
«2,5 jyldyń ishinde olardyń árqaısysy orta eseppen 113 mln teńgeni ótedi. Eger, bul kórsetkishti jedel-tergeý bólimsheleri ofıtserleriniń aı saıynǵy ortasha jalaqysymen salystyrsaq, bir qyzmetkerden 9 ese qarjylyq qaıtarym alamyz», - dep atap ótti departament basshysy.