6,5 mln adam úılerinen bezdi: Qazaqstan BUU QK-da qarýly qaqtyǵystarǵa óz ustanymyn bildirdi

ASTANA. QazAqparat - QR Syrtqy ister mınıstriniń orynbasary Ǵalymjan Qoıshybaev BUU-nyń Nıý-Iorktegi shtab-páterinde ótken BUU Qaýipsizdik Keńesiniń «Qarýly qaqtyǵysta azamattyq tulǵalardy qorǵaý» taqyrybyndaǵy ashyq debatqa qatysty, dep habarlaıdy QazAqparat QR SІM Baspasóz qyzmetine silteme jasap.

Debatta Polshanyń Syrtqy ister mınıstri ıAtsek Chapýtovıchtiń tóraǵalyǵymen, negizgi baıandamashylar retinde BUU Bas hatshysy Antonıý Gýterrısh jáne Halyqaralyq Qyzyl krest uıymynyń bas dırektory Iv Dakkor sóıledi. Sharaǵa QK múshelerimen qatar, 70 memlekettiń jáne birqatar halyqaralyq uıymnyń joǵarǵy laýazymdy ókilderi qatysty.

Otyrys qatysýshylary qarýly qaqtyǵys saldarynan qurbandardyń sany artyp kele jatqanyna alańdaýshylyq bildirdi. 65,6 mln adam úılerinen bezip, 128 mln adam jedel gýmanıtarlyq kómekke zárý ekeni málim etildi. Sóz sóılegender barlyq shıelenis qatysýshylaryn halyqaralyq gýmanıtarlyq quqyq normalaryn durys saqtaýǵa, sonymen qatar medıtsınalyq ınfraqurylym nysandaryna shabýyldy doǵarýǵa, adam kóp ornalasqan óńirlerde jarylys jasamaýǵa, muqtaj jandarǵa gýmanıtarlyq kómek kórsetýge shaqyrdy.

Óz sózinde  Ǵ.Qoıshybaev Qazaqstan Respýblıkasy Prezıdenti N.Á.Nazarbaevtyń 2017 jyldyń BUU Kaýipsizdik Keńesindegi saıası úndeýine negizdelgen usynystaryn bildirdi. Atalmysh usynystar - qarýly qaqtyǵystarda azamattyq tulǵalardy qorǵaýdy kúsheıtýge jáne halyqaralyq gýmanıtarlyq quqyq normalarynyń saqtalýyn qamtamasyz etýge baǵyttalǵan. Ol qaýipsizdik, damý jáne birlik arasyndaǵy úzdiksiz baılanysty qamtamasyz etý barysynda qaqtyǵystardyń sebebin joıý sekildi halyqaralyq jáne óńirlik deńgeıdegi aldyn alý sharalarynyń artyqshylyqtaryn aıta ketti. Qazaqstannyń jasap jatqan jumysynyń mysaly retinde, dál qazir elden materıaldyq, gýmanıtarlyq jáne tehnıkalyq kómek alyp júrgen Aýǵanstan aıtyldy.

2018 jyly 23 mamyrda qazaqstandyq dıplomat Qaýipsizdik Keńesiniń Taıaý Shyǵysty retteý jónindegi brıfıngine qatysqan bolatyn. Óz sózinde Astananyń Izraıl men Palestına shıelenisiniń qosmemlekettik sheshiminiń formýlasyna adal ekenin aıta ketti, sondaı-aq, taraptardy birjaqty áreketten aýlaq bolýǵa shaqyrdy.