6,2 mln qazaqstandyqtyń bankte kredıti bar - agenttik

NUR-SULTAN. QazAqparat – 1,5 mln-ǵa jýyq qaryz alýshynyń problemaly kredıti bar. Bul týraly QR Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti, dep habarlaıdy QazAqparat tilshisi.

«Bankterde jeke tulǵalarǵa qatysty 6,2 mln adamnyń nesıesi bar», - dep toqtaldy M. Ábilqasymova Parlament Májililisinde tilshiler saýalyna jaýap bere otyryp.

Onyń aıtýynsha, sońǵy jyldary problemaly qaryz alýshylardy anyqtaý boıynsha aýqymdy jumystar atqaryldy.

«Banktiń teńgeriminde turǵan problemaly qaryz alýshylar bar, sonymen qatar balanstan tys osyndaı qaryzdar tirkelgen. Biz tıisti esepteýler júrgizip, osyndaı problemaly qaryz alýshylardy jalpy sanyn anyqtadyq. Eger barsha bank pen mıkroqarjy uıymyn, sondaı-aq bankterdiń kollektorlarǵa satqan qaryzdaryn qamtysaq, onda 1,5 mln-ǵa jýyq qaryz alýshynyń problemaly nesıesi bar», - dedi ol.

Agenttik basshysy bankterdiń balansynda 430 myńǵa jýyq problemaly nesıe tirkelgenin aıtty. Al qalǵany mıkroqarjy uıymdary men bankterdiń balanstan tys tiziminde qamtylǵan.

Budan buryn habarlanǵandaı, M. Ábilqasymova byltyr tutynýshylyq nesıeler 40 paıyzǵa óskenin aıtty.