5G júıesi: 1,3 myńnan astam bazalyq stantsııa ornatyldy

<p>ASTANA. KAZINFORM &ndash; QR Tsıfrlyq damý, ınnovatsııalar jáne aeroǵarysh ónerkásibi mınıstrligi elimizdiń aýmaǵyn 5G ınternet jelisimen qamtý qarqynyna qatysty túsinik berdi.</p>

«QR Úkimetiniń 2023 jylǵy 27 qazanyndaǵy №949 qaýlysymen bekitilgen «Qoljetimdi ınternet» Ulttyq jobasynyń aıasynda elimizdiń respýblıkalyq mańyzy bar qalalaryn (75% aýmaǵy) jáne oblys ortalyqtaryn (60% aýmaǵy) 5G mobıldi tehnologııasymen qamtý jumystary júzege asyrylyp jatyr. Qazirgi kezde elimizdiń 20 qalasynda 1300-den astam bazalyq stantsııa ornatyldy», - delingen Tsıfrlyq damý mınıstrliginiń Kazinform agenttigine bergen jaýabynda. 

Vedomstvo málimetinshe, Memleket basshysynyń tapsyrmasyna sáıkes, 5G mobıldi tehnologııasyn engizý jumystary 2025 jyldyń sońyna deıin aıaqtalýy tıis.

Aıta keteıik, 2027 jyldyń sońyna deıin baılanys operatorlary 5G tehnologııasyn damytýǵa 450 mıllıard teńge ınvestıtsııa salady.