5G engizý tarıf qunyn kóterý esebinen júzege asyrylýy múmkin - Básekelestik agenttigi

ASTANA. QazAqparat – Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov elimizde tuńǵysh ret ótken 5G úshin ashyq aýktsıonǵa qatysty monopolııalyq táýekelderdi atady, dep habarlaıdy QazAqparat tilshisi.

«Konkýrs qorytyndysy bizdi tolyq qanaǵattandyrmaıdy. Birinshi kezekte monopolııalandyrý táýekelderin kórip otyrmyz. Sol sııaqty naryqta jeke operatordyń paıda bolý múmkindiginen aıryldyq. Ekinshiden, jeke ınvestıtsııadan qaǵylamyz, óıtkeni budan ári 5G boıynsha ınvestıtsııa quıýdy memlekettik kompanııa júzege asyrmaq. Úshinshi qaýip 5G-di engizý tarıf qunyn kóterý esebinen júzege asyrylýy múmkin. Osy oraıda, buǵan jol bermeý úshin biz jalpy jaǵdaıdy, onyń ishinde operatorlardyń tarıf baǵasyna qatysty áreketterin baqylaýda ustaımyz», - dedi Rýstam Ahmetov OKQ-de ótken brıfıngide.

Sondaı-aq, spıker 5G engizý boıynsha quzyrly mınıstrlikke agenttik atynan usynystar jiberilgenin aıtty.

«Elimizde radıojıilik spektrin taratý boıynsha aýktsıon alǵash ret ótip otyr. Bul shekteýli memlekettik resýrsqa teń qoljetimdilik degen sóz. Ekinshiden, atalǵan baıqaýdyń arqasynda elimizde 5G engizý jumysy qarqyndy júrip jatyr. Odan bólek, bıýdjet iri kólemde, ıaǵnı 150 mlrd teńgege tolyqtyryldy», - deıdi ol.

Aıta keteıik, 22 jeltoqsanda Qazaqstanda alǵash ret 5G úshin radıojıilikterge ashyq aýktsıon ótti.

Sondaı-aq, 5G jıiligine arnalǵan ekinshi ashyq aýktsıon somasy rekordqa jetti. Ol týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın málimdegen edi.

Foto: GETTY IMAGES